---Advertisement---
ओबीसी आंदोलनाचे प्रमुख नेते लक्ष्मण हाके यांचा एक व्हिडिओ सोशल मीडियावर मोठ्या प्रमाणात व्हायरल होत असून, त्यांच्या वक्तव्यामुळे राजकीय वर्तुळात विविध चर्चांना सुरुवात झाली आहे. या व्हिडिओमध्ये हाके यांनी एका नेत्याचा नाव न घेता उल्लेख करत काही नाराजी व्यक्त केल्याचे दिसून येत आहे.
व्हायरल व्हिडिओमध्ये हाके म्हणतात की, काही नेत्यांकडे संघटनात्मक ताकद, यंत्रणा आणि माध्यमांवर प्रभाव असल्याने त्यांना वेगळा पाठिंबा मिळतो. तसेच, एका बैठकीदरम्यान आंदोलन थांबवण्याचा सल्ला देण्यात आला होता, असेही त्यांनी सूचित केले.
यावेळी त्यांनी एका प्रसंगाचा उल्लेख करत, “मुख्यमंत्री आणि दोन उपमुख्यमंत्र्यांना भेटण्यासाठी ते तिघे गेले होते आणि आम्हीही तिघे होतो, असे सांगितले गेले. ते वाक्य मला त्यावेळी खटकलं होतं,” असे म्हटले. मात्र त्यांनी संबंधित नेत्याचे नाव स्पष्ट केले नाही.
दरम्यान, व्हिडिओ व्हायरल झाल्यानंतर माध्यमांनी संपर्क साधला असता हाके यांनी प्रतिक्रिया देत, “व्हिडिओचा संपूर्ण संदर्भ न पाहता त्यावर चर्चा होत आहे. मी सध्या ओबीसी समाजाच्या प्रश्नांसाठी लढत असून, त्या मुद्द्यांवर लक्ष केंद्रित व्हायला हवे,” असे सांगितले.
तसेच, “माझी प्रतिमा खराब करण्याचा प्रयत्न होत असला तरी मी माझी भूमिका मांडत राहणार,” असेही त्यांनी स्पष्ट केले. संबंधित वक्तव्य नेमके कोणाबद्दल होते, याबाबत मात्र त्यांनी कोणतेही नाव घेतले नाही.
या व्हिडिओमुळे राजकीय वर्तुळात तर्क-वितर्कांना उधाण आले असून, हाके यांच्या सूचक वक्तव्यामागील संदर्भ काय आहे, याबाबत चर्चा सुरू आहे.
