---Advertisement---
नॅशनल अकॅडमी ऑफ लीगल स्टडीज अँड रिसर्च (NALSAR) विद्यापीठाच्या आगामी दीक्षांत समारंभातील प्रमुख पाहुण्यांच्या निवडीवरून वाद निर्माण झाला आहे. सरन्यायाधीश सूर्यकांत यांना कार्यक्रमासाठी आमंत्रित करण्यात आल्याच्या पार्श्वभूमीवर 2026 च्या पदवीधर विद्यार्थ्यांपैकी एका गटाने विद्यापीठ प्रशासनाकडे या निर्णयाचा पुनर्विचार करण्याची मागणी केली आहे.
विद्यार्थ्यांनी कुलगुरू, कुलसचिव, प्राध्यापक आणि प्रशासनाला पत्र पाठवून आपली भूमिका मांडली आहे. अलीकडील काही न्यायालयीन वक्तव्यांचा दाखला देत विद्यार्थ्यांनी सरन्यायाधीशांना प्रमुख पाहुणे म्हणून आमंत्रित करण्याबाबत आक्षेप नोंदवला आहे.
‘विद्यार्थ्यांच्या भावनांचा विचार व्हावा’
विद्यार्थ्यांच्या पत्रानुसार, सरन्यायाधीशांच्या काही वक्तव्यांमुळे तरुण आणि विद्यार्थ्यांबाबत असंवेदनशीलता व्यक्त झाल्याची भावना निर्माण झाली आहे. त्यामुळे विद्यापीठाच्या पदवीदानासारख्या महत्त्वाच्या कार्यक्रमात त्यांच्याकडून पदवी स्वीकारणे आपल्यासाठी अस्वस्थ करणारे असल्याचे विद्यार्थ्यांनी म्हटले आहे.
या निर्णयाकडे केवळ काही विद्यार्थ्यांचा वैयक्तिक आक्षेप म्हणून न पाहता, पदवीधर विद्यार्थ्यांच्या व्यापक चिंतेचा भाग म्हणून विचार करावा, अशी विनंती प्रशासनाला करण्यात आली आहे.
‘कॉकरोच’ वक्तव्यावरून आधीच वाद
सरन्यायाधीश सूर्यकांत यांच्या एका न्यायालयीन सुनावणीतील वक्तव्यावरून यापूर्वीही मोठा वाद निर्माण झाला होता. बेरोजगार तरुण आणि व्यवस्थेवर टीका करणाऱ्यांचा संदर्भ देताना त्यांनी ‘कॉकरोच’ हा शब्द वापरल्याचे वृत्त समोर आले होते. या वक्तव्यावरून सोशल मीडियावर मोठी प्रतिक्रिया उमटली होती.
या पार्श्वभूमीवर विद्यार्थ्यांनी आता त्यांच्या दीक्षांत समारंभातील उपस्थितीवर प्रश्न उपस्थित केला आहे.
विद्यापीठाच्या भूमिकेकडे लक्ष
विद्यार्थ्यांचे पत्र समोर आल्यानंतर या प्रकरणाची चर्चा कायदेशीर आणि शैक्षणिक वर्तुळात सुरू झाली आहे. मात्र, विद्यार्थ्यांच्या मागणीवर NALSAR विद्यापीठ प्रशासनाकडून अद्याप अधिकृत भूमिका समोर आलेली नाही.
त्यामुळे प्रशासन प्रमुख पाहुण्यांच्या निवडीबाबत निर्णय बदलणार का, विद्यार्थ्यांची मागणी मान्य करणार का किंवा पूर्वीचा निर्णय कायम ठेवणार, याकडे आता लक्ष लागले आहे.
