करोडोंचं साम्राज्य असूनही पैशांची चणचण; संतापलेल्या सुनेने उचललं टोकाचं पाऊल?

उत्तर प्रदेशातील कानपूरमध्ये 63 वर्षीय औषध व्यावसायिक विनीत मिनोचा यांच्या हत्येप्रकरणी धक्कादायक माहिती समोर आली आहे. पोलिसांच्या तपासानुसार, मिनोचा यांच्या सुनेवरच हत्येचा कट रचल्याचा आरोप आहे. आर्थिक व्यवहारांवरील नियंत्रण आणि घरातील सीसीटीव्ही कॅमेऱ्यांमुळे निर्माण झालेल्या वादातून हा कट रचल्याचा पोलिसांचा संशय आहे. या प्रकरणात शालू मिनोचा हिला अटक करण्यात आली असून, तिची भूमिका कॉल रेकॉर्ड आणि इतर पुराव्यांच्या आधारे तपासली जात आहे.

घरातच तयार झाला हत्येचा कट?

विनीत मिनोचा हे कानपूरमधील औषध व्यवसायाशी संबंधित होते. त्यांच्या कुटुंबाच्या ‘फार्मा ट्रेडर्स’ या घाऊक औषध व्यवसायाची वार्षिक उलाढाल 40 कोटी रुपयांपेक्षा अधिक असल्याचे पोलिसांनी सांगितले आहे. मात्र, एवढा मोठा व्यवसाय असूनही घरातील आर्थिक व्यवहारांवर विनीत यांचे नियंत्रण असल्याचा दावा तपासात समोर आला आहे. शालूने स्वतःसह पतीला ठराविक रक्कम दिली जात असल्याचे आणि अतिरिक्त खर्चासाठी सासऱ्यांकडे पैसे मागावे लागत असल्याचे पोलिसांना सांगितल्याची माहिती आहे.

सीसीटीव्हीमुळे नाराजी वाढल्याचा दावा

घराच्या सुरक्षेसाठी विनीत यांनी फ्लॅटमध्ये सीसीटीव्ही कॅमेरे बसवले होते. मात्र, यामुळे आपल्या खासगी आयुष्यात हस्तक्षेप होत असल्याची भावना शालूला होती, असा पोलिसांचा दावा आहे. रात्री उशिरा बाहेर जाण्यावरूनही सासरे-सुनेमध्ये वाद होत असल्याची माहिती तपासात समोर आली आहे.

28 जुलै रोजी पार्टीवरून उशिरा घरी परतण्याच्या मुद्द्यावरून दोघांमध्ये वाद झाल्याचेही पोलिसांनी सांगितले आहे. यानंतर शालूने विनीत यांच्याविरोधात टोकाचे पाऊल उचलल्याचा आरोप आहे.

माजी कर्मचाऱ्याला हत्येची सुपारी दिल्याचा आरोप

पोलिसांच्या माहितीनुसार, शालूने विनीत यांच्या माजी कर्मचाऱ्याशी संपर्क साधला आणि त्याला हत्येसाठी सहा लाख रुपये देण्याचे ठरले. विशाल गौतम याने आपल्या साथीदार राजकिशोरला या कटात सहभागी केल्याचा आरोप आहे.

तपासात दोघांनी घरात प्रवेश करण्यासाठी बनावट चावी वापरल्याचे आणि सुरक्षा रक्षकाला वेगळी माहिती देऊन फ्लॅटमध्ये प्रवेश केल्याचे समोर आले आहे. हत्येच्या रात्री विनीत यांचा मुलगा, सून आणि नातू एका कार्यक्रमासाठी बाहेर गेले होते. त्यानंतर दोघे संशयित घरात पोहोचल्याचे पोलिसांचे म्हणणे आहे.

चोरीचा हेतू नसल्याने पोलिसांचा संशय बळावला

विनीत मिनोचा यांचा मृतदेह फ्लॅटमध्ये आढळल्यानंतर सुरुवातीला पोलिसांनी चोरीच्या शक्यतेचाही तपास केला. मात्र, घरातील मौल्यवान वस्तूंना हात लावला गेला नसल्याचे आढळल्यानंतर हा प्रकार वैयक्तिक वादातून झाला असावा, असा संशय पोलिसांना आला.

सीसीटीव्ही फुटेज, सुरक्षा रक्षकाचे जबाब आणि आरोपींमधील फोन संभाषण तपासल्यानंतर तपासाची दिशा कुटुंबातील व्यक्तींकडे वळली. त्यानंतर शालूची चौकशी करण्यात आली.

पतीच्या भूमिकेचीही चौकशी

या प्रकरणात शालूच्या पतीची भूमिका अद्याप स्पष्ट झालेली नाही. पोलिस त्याच्या कॉल डिटेल्ससह इतर पुराव्यांची पडताळणी करत आहेत. त्यामुळे हत्येच्या कटाची संपूर्ण साखळी आणि त्यात आणखी कोणाचा सहभाग होता का, याचा तपास सुरू आहे.

कुटुंबातील आर्थिक नियंत्रण, सीसीटीव्हीवरून निर्माण झालेला कथित वाद आणि त्यानंतर माजी कर्मचाऱ्याच्या माध्यमातून हत्या घडवून आणल्याचा आरोप यामुळे या प्रकरणाने कानपूरमध्ये खळबळ उडाली आहे. मात्र, सुनेवरील आरोपांचा अंतिम निष्कर्ष न्यायालयीन प्रक्रियेनंतरच स्पष्ट होणार आहे.