---Advertisement---
मुंबईतील विक्रोळी परिसरात किरकोळ कारणावरून झालेल्या कौटुंबिक वादाने गंभीर वळण घेतले. पहाटेच्या वेळी घरात मोठ्या आवाजात गाणी लावल्याच्या कारणावरून सख्ख्या भावांमध्ये वाद झाला. यानंतर दोन भावांनी एका भावावर आणि त्याच्या 14 वर्षीय मुलावर चाकूने हल्ला केल्याची घटना समोर आली आहे.
ही घटना विक्रोळीतील राहुल नगर परिसरात 6 ऑगस्टच्या पहाटे घडल्याची माहिती आहे. एका घरात चार भाऊ राहत होते. त्यापैकी सुनील विश्वकर्मा यांनी पहाटे मोठ्या आवाजात गाणी लावल्याने त्यांचे भाऊ सुरेंद्र आणि सूरज यांनी त्याला विरोध केला.
सुरुवातीला गाणी बंद करण्यावरून शाब्दिक वाद झाला. मात्र, काही वेळातच परिस्थिती हाताबाहेर गेली. आरोपानुसार, सुरेंद्र आणि सूरज यांनी सुनील यांच्यावर आधी मारहाण केली. त्यानंतर चाकूने हल्ला करण्यात आला. सुनील यांचा 14 वर्षांचा मुलगा श्लोक यालाही या हल्ल्यात गंभीर दुखापत झाली.
हल्ल्यानंतर परिसरात एकच खळबळ उडाली. जखमी बाप-लेकाला तातडीने रुग्णालयात दाखल करण्यात आले असून, दोघांवर उपचार सुरू आहेत. त्यांची प्रकृती गंभीर असल्याची माहिती आहे.
दरम्यान, हा वाद केवळ गाण्यांच्या आवाजावरून झाला की, कुटुंबात यापूर्वीपासून काही वाद होते, याचा तपास पोलिसांकडून केला जात आहे. किरकोळ कारणातून इतका टोकाचा प्रकार घडल्याने परिसरातील नागरिकांमध्येही संताप व्यक्त केला जात आहे.
विक्रोळी पोलिसांनी घटनेची नोंद घेत तपास सुरू केला आहे. आरोपी भावांविरोधात कायदेशीर कारवाई करण्यात येत असून, हल्ल्यामागील नेमकं कारण आणि घटनाक्रम जाणून घेण्यासाठी पोलिसांकडून पुढील चौकशी केली जात आहे.
