सुरक्षा व्यवस्थेत घुसखोरीचा संशय? मोदींच्या दौऱ्याआधी मुंबईत संशयितांची धरपकड

पंतप्रधान नरेंद्र मोदी यांच्या मुंबई दौऱ्यापूर्वी बीकेसी परिसरातील सुरक्षा व्यवस्थेत खळबळ उडवणारी घटना समोर आली आहे. निता मुकेश अंबानी कल्चरल सेंटरमध्ये (NMACC) सुरक्षा तपासणीदरम्यान दोन व्यक्तींना ताब्यात घेण्यात आले. त्यापैकी एका व्यक्तीकडे पंतप्रधान कार्यालयाची (PMO) बनावट ओळखपत्र असल्याचे आढळले, तर त्याच्यासोबत असलेल्या बॉडीगार्डकडून बंदूक जप्त करण्यात आली. मुंबई क्राइम ब्रँचकडून दोघांची चौकशी सुरू आहे.

PMO अधिकारी असल्याचा दावा

ताब्यात घेतलेल्या व्यक्तीची ओळख 24 वर्षीय रोहन पारेख अशी करण्यात आली आहे. तो स्वतःला PMOचा अधिकारी असल्याचे सांगत होता. मात्र, सुरक्षा कर्मचाऱ्यांनी त्याच्या ओळखपत्राची पडताळणी केली असता ते बनावट असल्याचे समोर आले.

त्यानंतर सुरक्षा यंत्रणांनी त्याच्यासोबत असलेल्या व्यक्तीचीही तपासणी केली. या व्यक्तीकडे बंदूक असल्याचे आढळल्यानंतर दोघांनाही ताब्यात घेण्यात आले.

बंदुकीच्या परवान्याचीही चौकशी

प्राथमिक माहितीनुसार, बंदूक बाळगणारा व्यक्ती रोहन पारेखचा बॉडीगार्ड असल्याचे सांगितले जात आहे. या शस्त्राचा परवाना वैध आहे का, तसेच पंतप्रधानांच्या कार्यक्रमासाठी कडेकोट सुरक्षा असलेल्या ठिकाणी सशस्त्र बॉडीगार्डसह जाण्याचे कारण काय होते, याचीही चौकशी केली जात आहे.

नेमका उद्देश काय? तपास सुरू

या दोघांचा कार्यक्रमस्थळी येण्यामागचा नेमका हेतू अद्याप स्पष्ट झालेला नाही. बनावट PMO ओळखपत्र कुठून मिळाले, ते तयार करण्यामागे कोणाचा सहभाग आहे आणि दोघांचे इतर कोणाशी संबंध आहेत का, या दिशेने तपास सुरू आहे.

दरम्यान, उपलब्ध प्राथमिक माहितीनुसार या दोघांचा पंतप्रधानांना लक्ष्य करण्याचा हेतू होता, असा कोणताही अधिकृत निष्कर्ष अद्याप समोर आलेला नाही. त्यामुळे तपास पूर्ण होण्यापूर्वी या घटनेला कोणत्याही मोठ्या कटाशी जोडणे घाईचे ठरेल.

ग्लोबल फिनटेक फेस्टच्या पार्श्वभूमीवर सुरक्षा कडक

पंतप्रधान नरेंद्र मोदी मंगळवारी मुंबईत ग्लोबल फिनटेक फेस्टच्या कार्यक्रमाला उपस्थित राहणार आहेत. याच पार्श्वभूमीवर NMACC आणि बीकेसी परिसरात सुरक्षा व्यवस्था कडक करण्यात आली आहे. कार्यक्रमस्थळी प्रवेश करणाऱ्या व्यक्तींची ओळख आणि सुरक्षा तपासणी काटेकोरपणे केली जात आहे.

या घटनेनंतर मुंबई क्राइम ब्रँचकडून दोघांची पार्श्वभूमी, कार्यक्रमस्थळी येण्याचा उद्देश आणि बनावट ओळखपत्राचा स्रोत यांचा तपास केला जात आहे. तपासातून पुढे काय माहिती समोर येते, याकडे सुरक्षा यंत्रणांसह सर्वांचे लक्ष लागले आहे.