मुंबई इंडियन्समध्ये मोठा बदल होणार? 2027 साठी कर्णधारपदाच्या शर्यतीत दोन दिग्गज; रोहित शर्माचीही भूमिका महत्त्वाची

आयपीएल 2026 मधील निराशाजनक मोहिमेनंतर मुंबई इंडियन्सच्या गोटात मोठ्या बदलांची चर्चा सुरू झाली आहे. विशेषतः 2027 च्या हंगामासाठी संघाच्या नेतृत्वात बदल होण्याची शक्यता व्यक्त केली जात आहे. सध्याच्या माहितीनुसार, जसप्रीत बुमराह आणि तिलक वर्मा ही दोन प्रमुख नावं कर्णधारपदासाठी चर्चेत आहेत. या निर्णयाच्या प्रक्रियेत माजी कर्णधार रोहित शर्माचाही सल्ला घेतला जात असल्याचे वृत्त आहे.

रोहित पुन्हा कॅप्टन होणार?

रोहित शर्मा पुन्हा मुंबई इंडियन्सचे नेतृत्व स्वीकारणार असल्याची चर्चा याआधी झाली होती. मात्र, सध्याच्या वृत्तांनुसार फ्रँचायझी नव्या नेतृत्वाचा पर्याय तपासत आहे. त्यामुळे रोहितकडे पुन्हा कर्णधारपद देण्याऐवजी त्याचा अनुभव नव्या कर्णधाराच्या निवडीत वापरला जाण्याची शक्यता आहे.

तिलक वर्माला संधी मिळणार?

कर्णधारपदाच्या शर्यतीत तिलक वर्माचे नाव आघाडीवर असल्याचे काही रिपोर्ट्समध्ये म्हटले आहे. युवा फलंदाज म्हणून तिलकने मुंबईच्या संघात आपले स्थान मजबूत केले असून, भविष्यातील नेतृत्वासाठी त्याच्याकडे पाहिले जात आहे. दुसरीकडे, जसप्रीत बुमराहकडे आंतरराष्ट्रीय तसेच आयपीएलमधील नेतृत्वाचा अनुभव असल्याने तोही मजबूत दावेदार आहे.

हार्दिक पांड्याचं काय?

2026 च्या हंगामानंतर हार्दिक पांड्याच्या ट्रेडबाबत जोरदार चर्चा रंगली होती. मात्र, सध्या त्याच्या ट्रेडबाबत कोणताही अंतिम निर्णय झालेला नसल्याचे रिपोर्ट्स आहेत. काही फ्रँचायझींशी संभाव्य चर्चांच्या बातम्या समोर आल्या असल्या तरी डील अद्याप निश्चित झालेली नाही. त्यामुळे हार्दिक 2027 मध्ये मुंबईकडून खेळताना दिसतो की दुसऱ्या संघात जातो, याकडे लक्ष लागले आहे.

महेला जयवर्धनेकडे पुन्हा जबाबदारी?

कर्णधारपदाबाबत बदलाची शक्यता असली तरी प्रशिक्षकपदात सातत्य ठेवण्याचा मुंबई इंडियन्सचा कल असल्याचे दिसत आहे. महेला जयवर्धने 2027 मध्येही मुख्य प्रशिक्षक म्हणून कायम राहण्याची शक्यता आहे. 2024 मध्ये त्याने ‘2+1’ वर्षांच्या करारावर संघात पुनरागमन केले होते आणि 2027 हे या करारातील शेवटचे वर्ष ठरू शकते.

सूर्यकुमार यादव MI सोडणार?

सूर्यकुमार यादवच्या भविष्याबाबतही काही काळ चर्चा होती. मात्र, सध्याच्या रिपोर्ट्सनुसार मुंबई इंडियन्स त्याला संघातून बाहेर करण्याच्या तयारीत नाही. त्यामुळे 2027 मध्ये सूर्यकुमार यादव ‘वन फॅमिली’सोबत कायम राहण्याची शक्यता आहे.

एकंदरीत, 2027 पूर्वी मुंबई इंडियन्ससमोर कर्णधारपद, हार्दिक पांड्याचे भवितव्य आणि संघाची पुनर्बांधणी हे तीन मोठे निर्णय असणार आहेत. यामध्ये तिलक वर्मा विरुद्ध जसप्रीत बुमराह अशी कर्णधारपदाची लढत रंगण्याची शक्यता आहे.