उत्तराखंडमधील उत्तरकाशी येथील बोगद्यात ३६ मजूर अडकले आहेत. बोगद्यात भूस्खलनामुळे हा प्रकार घडला. यमुनोत्री राष्ट्रीय महामार्गावर रस्ते बांधणीचे काम सुरू आहे. त्याअंतर्गत सिल्क्यरा ते दंडलगाव असा बोगदाही बांधण्यात येत आहे. माहिती मिळताच बचाव पथक तातडीने घटनास्थळी पोहोचले. बोगद्यातून कामगारांना बाहेर काढण्याचे प्रयत्न सुरू आहेत.
मिळालेल्या माहितीनुसार, बोगद्यात ३६ हून अधिक मजूर काम करत होते. जिल्हा आपत्ती व्यवस्थापन उत्तरकाशीने या अपघाताला दुजोरा दिला आहे. घटनास्थळी पोहोचलेल्या अधिकाऱ्यांनी सांगितले की, कामगारांची सुटका करण्यात येत आहे. एसडीआरएफ आणि संबंधित कंपनीच्या प्रयत्नांमुळे ढिगारा हटवण्याचे काम सुरू आहे. घटनास्थळी स्थानिक पोलिसांसह पाच 108 रुग्णवाहिका तैनात करण्यात आल्या आहेत.
एडीजी कायदा आणि सुव्यवस्था एपी अंशुमन यांनी सांगितले की, अद्याप कोणतीही जीवितहानी झाल्याचे वृत्त नाही. पोलिस दलासह एसडीआरएफ आणि इतर बचाव पथक घटनास्थळी पोहोचले आहे. रविवारी पहाटे पाच वाजता हा अपघात झाला. सिल्क्यराकडे जाणाऱ्या बोगद्याच्या प्रवेशद्वारापासून 200 मीटर अंतरावर ही भूस्खलन झाली. त्यावेळी तेथे अनेक मजूर काम करत होते.
ऑलवेदर रोड प्रकल्पांतर्गत तयार करण्यात येत असलेल्या या बोगद्याची लांबी साडेचार किमी असणार असून, त्यापैकी चार किमीचे बांधकाम पूर्ण झाले आहे. हा बोगदा सप्टेंबर 2023 मध्ये पूर्ण करण्याचे उद्दिष्ट होते, परंतु आता ते मार्च 2024 पर्यंत वाढविण्यात आले आहे. एनएचआयडीसीएलच्या निर्देशानुसार नवयुग कंपनीमार्फत हा बोगदा बांधण्यात येत आहे.
घटनेची माहिती मिळताच उत्तरकाशीचे पोलीस अधीक्षक अर्पण यदुवंशी यांनी तात्काळ घटनास्थळी पोहोचून बचावकार्याची कमान हाती घेतली. बोगद्यातील कामगारांसाठी पुरेसा ऑक्सिजन सिलिंडर उपलब्ध असल्याचे सांगण्यात येत आहे. बोगद्याच्या आत एक अतिरिक्त ऑक्सिजन पाईप देखील देण्यात आला आहे, सर्व कामगार बोगद्याच्या आत सुरक्षित आहेत. अर्पण यदुवंशी म्हणाले की, लवकरच बोगद्याच्या आतील भागाचा ढिगारा हटवला जाईल.
