मुंबई : येथील जोगेश्वरीमध्ये एक कुटुंब एका कॅबमध्ये २५ लाख रुपये किमतीचं सोनं असलेली बॅग विसरले होते. मुंबईत पोलिसांनी ६ दिवसात त्यांना त्यांची ही मौल्यवान बॅग परत मिळवून दिली आहे.
पोलिसांनी दिलेल्या माहितीनुसार, ४६ वर्षीय व्यवसायिक नजीर उल हसन यांनी १० ऑगस्ट रोजी ओशिवरा पोलीस स्टेशनमध्ये दागिन्यांनी भरलेली बॅग हरवल्याची तक्रार दाखल केली होती. त्यानंतर पोलीस ती बॅग शोधण्यासाठी सतत प्रयत्नशील होते.
वसईतून एक कुटुंब ९ ऑगस्ट रोजी उबर कॅबद्वारे जोगेश्वरीला गेलं होतं. जोगेश्वरीतील आदर्श नगरमध्ये त्यांनी त्यांचं सामान घेतलं आणि ते उतरले. पण नंतर कॅब पुढे गेल्यानंतर दागिन्यांची बॅग गायब असल्याचं त्यांच्या लक्षात आलं. त्यांनी लगेच कॅब ड्रायव्हरला कॉल केला, पण त्याच्याकडून उडवाउडवीचं उत्तर मिळालं. त्यांनी पुन्हा पुन्हा कॉल केले तेव्हा त्याने कॉल उचलले नाही.
उबर चालकाच्या या वागण्याने नाझीर नाराज झाला आणि त्याने पोलिसात तक्रार दाखल केली. त्याने पोलिसांना सांगितले की, कॅबमधून उतरताना कुटुंबीयांनी सर्व सामान बाहेर काढले पण स्लीपिंग बॅग आतच राहिली आणि आता कॅब चालक फोन उचलत नाही. पोलिसांनी गुन्हा नोंदवून तपास सुरू केला.
मुंबई पोलीस अधिकाऱ्याने कॅब ड्रायव्हरला फोन करून त्याच्याशी बोलण्याचा प्रयत्न केला, मात्र ड्रायव्हरने पोलिसांना सर्व काही बरोबर सांगितले नाही. त्यामुळे पोलिसांना चालकावर संशय आला. यानंतर पोलिसांनी या प्रकरणाचा अधिक तपास करून चालकाच्या पत्नीशी बोलणे केले. त्यानंतर संपूर्ण प्रकरण उघडकीस आले. सोन्याची बॅग त्यांच्या घरी ठेवल्याचे चालकाच्या पत्नीने पोलिसांना सांगितले. पोलिसांनी ड्रायव्हरच्या घरातून बॅग जप्त करून व्यावसायिकाला दिली. बॅग परत मिळाल्यानंतर व्यवसायिकाने पोलिसांचे आभार मानत त्यांनी केलेल्या मदतीसाठी त्यांचं कौतुकही केलं आहे.
