जळगाव : जंगलात टेंभरून खाण्यासाठी गेलेल्या सहा वर्षीय बालकावर अस्वलाने अचानक हल्ला केला. यात चिमुकला गंभीर जखमी झाला. त्याला उपचारासाठी रुग्णालयात दाखल करण्यात आले आहे.
यावल तालुक्याच्या सातपुडा पर्वत रांगेत असलेल्या नागादेवी आदिवासी वस्तीवरील राहुल राजू बारेला (६) हा इतर बालकांसोबत जंगलात टेंभरून खाण्यासाठी गेला होता. याच वेळी अचानक राहुल बारेला याच्यावर अस्वलाने पाठीमागून हल्ला केला. अस्वलाने हल्ला केल्याचा हा प्रकार वस्तीतील सुनील बारेला या तरुणाच्या निदर्शनास आले.
यावेळी त्याने काठीच्या सहाय्याने अस्वलाला हटकण्याचा प्रयत्न केला. यामुळे अस्वलाने तेथून पळ काढल्याने राहुल बारेला याला सोडवले. अस्वलाने केलेल्या हल्ल्यामुळे राहुल हा जखमी झाला आहे.
तर त्याला सोडविण्यासाठी गेल्यानंतर झालेल्या झटापटीत सुनील बारेला याच्या पायाला देखील अस्वलाने नखे मारली आहेत. यामुळे तो देखील जखमी झाला असून दोघा जखमीना तातडीने यावल ग्रामीण रुग्णालयात आणण्यात आले.
