धुळे : धारधार शस्त्रांनी हल्ला करून तरुणाला बेदम मारहाण केल्याची घटना रात्री ११.३० वाजेच्या सुमारास धुळ्यात घडली. या जीवघेण्या हल्ल्यात तरुण गंभीररित्या जखमी झाल्याने त्याला उपचारार्थ हिरे रुग्णालयात दाखल करण्यात आले. मात्र उपचार सुरू असताना तो आज सकाळी दगावला. या प्रकरणी काही संशयितांना पोलिसांनी ताब्यात घेतले असून त्यांची चौकशी सुरू असल्याची माहिती सूत्रांनी दिली आहे.
मिळालेल्या माहितीनुसार, शुभम जगन साळुंके (२७) असे मृत तरुणाचे आहे. रात्री ११.३० वाजेच्या सुमारास काही जणांनी शुभमला गांधी पुतळ्याजवळ मारहाण केली. यानंतर हल्लेखोरांनी शुभमला आपल्या दुचाकीवर बसवून वरखेडे कचरा डेपो परिसरात नेले. तेथे त्याला बेदम मारहाण करून धारदार शस्त्राने सपासप वार करण्यात आले. यात तो रक्तबंबाळ झाला. त्यानंतर अंगावर मोठे दगड टाकून त्याच्या पायांच्या हाडांचा अक्षरश: चुरा करण्यात आला. दरम्यान, शुभम निचपित पडल्याचे पाहून हल्लेखोर घटनास्थळावरून पसार झाले. घटनेची माहिती पोलिसांना कळताच आझाद नगर पोलीस ठाण्याचे पो. कॉ. प्रशांत पाटील, हवालदार प्रवीण दराडे हे धुळे शहरातील वरखेडे कचरा डेपोच्या परिसरात रात्री सव्वा बाराच्या सुमारास दाखल झाले.
पोलिसांनी गंभीर जखमी असलेल्या शुभम साळुंकेला त्यांच्या शासकीय वाहनाने हिरे रुग्णालयात भरती केले. तेथे त्याला वाचविण्याचे डॉक्टरांनी शर्थीचे प्रयत्न केले. परंतु आज सकाळी उपचार सुरू असताना त्याचा दुर्दैवी मृत्यू झाला आहे. यावेळी आज सकाळी मृताच्या मित्रांनी आणि नातेवाईकांनी धुळे जिल्हा रुग्णालयात मोठ्या प्रमाणात गर्दी केली होती. यावेळी पोलिसांनी गर्दीवर नियंत्रण मिळवत मृतदेह शविच्छेदनासाठी पाठवण्यात आला आहे. मात्र अद्यापपर्यंत आझाद नगर पोलीस ठाण्यात याप्रकरणी कुठलाही प्रकारचा गुन्हा दाखल करण्यात आला नाही. मात्र याप्रकरणी काही संशयितांना पोलिसांनी ताब्यात घेतले असून त्यांची चौकशी सुरू असल्याची माहिती खात्रीशीर सूत्रांनी दिली आहे.
