रावेर । तालुक्यातील केऱ्हाळे बुद्रुक येथे नववीच्या वर्गात शिकणाऱ्या विद्यार्थीने घरात गळफास घेऊन आत्महत्या केल्याची घटना उघडकीस आली. नंदिनी दीपक महाजन (वय १५, रा. केऱ्हाळे बु. ता. रावेर) असे मयत विद्यार्थिनीचे नाव आहे. दरम्यान, नंदिनीच्या आत्महत्यामागचे कारण अद्यापही समजू शकले नसून याबाबत रावेर पोलीस स्टेशनला अकस्मात मृत्यूची नोंद करण्यात आली
केऱ्हाळे बु. येथे नंदिनी दीपक महाजन ही तिची आईची आई अर्थात आजीसोबत राहत होती. तिचा मामा एक वर्षांपूर्वी वारला आहे. तर आई लहानपणापासूनच विभक्त झाली असून वडील दीपक यांचे निधन झालेले आहे. ती केऱ्हाळे गावात दत्तू सोनजी माध्यमिक विद्यालयात इयत्ता नववीत शिकत होती. तिची आजी निर्मला भाजीपाला विक्री करून उदरनिर्वाह करून दोघांचे पोट भरत होती. शनिवारी आजी निर्मला महाजन बाहेरगावहून भाजीपाला विक्री करून रात्री ८ वाजता घरी परतल्यावर तिला दरवाजे बंद आढळले.
त्यांनी शेजारील घराच्या छतावरून जाऊन जिन्याद्वारे स्वतःच्या घरात प्रवेश केला. यावेळी नात नंदिनी हिने गळफास घेतल्याचे दिसले. तेव्हा तिने हंबरडा फोडला. शेजाऱ्यांनी नंदिनीला रुग्णालयात दाखल केले. रावेर पोलीस स्टेशनला अकस्मात मृत्यूची नोंद करण्यात आली असून तपास पोलीस उपनिरीक्षक तुषार करीत आहे.
