अक्कलकुवा : तालुक्यातील ओढी येथील गोठ्यात शिरून बिबट्याने शेळीला ठार केल्याची घटना मंगळवारी रात्री अडीच वाजण्याच्या सुमारास घडली. गोठा आणि घराची भिंत एकच असल्याने घटनेमुळे खळबळ उडाली आहे.
विजा वेस्ता वसावे यांच्या घरातील गुरांच्या गोठ्यात ही घटना घडली आहे. मंगळवारी रात्री दोन वाजण्याच्या सुमारास त्यांच्या घराला लागून असलेल्या गुरांच्या गोठ्यात शिरून बिबट्याने प्रवेश केला होता.
गोठ्याचा कूड तोडून बिबट्या आत गेला होता. गोठ्यात गेल्यावर बिबट्याने शेळीवर हल्ला करत तिला ठार करून ओढून बाहेर नेले.
सकाळी हा प्रकार समोर आल्यानंतर भीती निर्माण झाली आहे. सोमवारी पहाटे वालंबा निंबापाटी राऊतपाडा येथे बिबट्याने शेळी ठार केल्याची घटना घडली होती.
यानंतर, लागलीच ही घटना घडल्याने एकच खळबळ उडाली आहे. पाळीव शेळ्यांवर हल्ला करणाऱ्या बिबट्याला जेरबंद करण्याची मागणी ओढी, वालंबा आणि राऊतपाडा येथील ग्रामस्थांनी केली आहे.
