अलिबाग : पोलीस भरती प्रक्रियेत चार उमेदवारांनी बोगस प्रमाणपत्र सादर केल्या धक्कादायक बाब समोर आली आहे. या चारही उमेदवारांविरोधात फसवणूकीचा गुन्हा दाखल करून त्यांना अटक करण्यात आली आहे. रायगड पोलीस भरतीमध्ये हा धक्कादायक प्रकार घडला आहे. या प्रकरणात आणखी काही नावे पुढे येण्याची शक्यता आहे.
रायगड पोलीस दलात २७२ जागांसाठी डिसेंबर महिन्यात भरती प्रक्रिया सुरू झाली होती. मैदानी चाचणी, लेखी परीक्षा मध्ये पात्र झालेल्या २७२ जणांची अंतिम यादी पोलीस प्रशासनाने जाहीर केली होती. या भरतीत प्रकल्पग्रस्तांसाठीही राखीव जागा असल्याने प्रकल्पग्रस्त उमेदवार भरतीत उतरले होते.
गडचिरोली जिल्ह्यात पोलीस भरतीत बोगस प्रमाणपत्र प्रकरण समोर आले होते. यामध्ये अलिबागमधील पोलीस शिपाई याला अटक झाली होती. त्यामुळे प्रकल्पग्रस्त पात्र उमेदवार यांचे प्रमाणपत्र तपासणीसाठी रायगड पोलिसांनी बीड, सोलापूर, नांदेड आणि इतर ठिकाणी आपले पथक पाठवून माहिती गोळा केली होती.
या माहितीत ररोहित बबन मगर रा. सोलापूर, केशव गिरजाजी मुरमुरे रा. नांदेड, गोविंद सुखदेव ठाणगे रा. बीड, अच्युत भागवत माने रा. बीड या चौघांनी बोगस प्रमाणपत्र देऊन शासकीय नोकरी मिळवण्याचा प्रयत्न केल्याची बाब समोर आली. अलिबाग पोलीस ठाण्यात चौघांविरोधात भा. दं. वि. ४२०, ४६७, ४६८, ४७१, ३४ प्रमाणे फसवणुकीचा गुन्हा दाखल करण्यात आला आहे.
