भाजप नेते शाहनवाज हुसेन यांना हृदयविकाराचा झटका आला आहे. सध्या त्यांना मुंबईतील लीलावती रुग्णालयात दाखल करण्यात आले आहे. आज दुपारी साडेचारच्या सुमारास हुसैन यांना हृदयविकाराचा झटका आला, त्यानंतर त्यांना तातडीने लीलावती रुग्णालयात दाखल करण्यात आले.
मिळालेल्या माहितीनुसार, डॉ.जलील पारकर यांच्या देखरेखीखाली अँजिओप्लास्टी करण्यात आली आहे. सध्या शाहनवाज हुसेन यांची प्रकृती ठीक असून त्यांना आयसीयूमध्ये हलवण्यात आले आहे. डॉक्टरांचे पथक शाहनवाज हुसैन यांच्या प्रकृतीवर लक्ष ठेवून आहे.
शाहनवाज हुसैन यांची गणना भाजपच्या दिग्गज नेत्यांमध्ये केली जाते. अटलबिहारी वाजपेयी यांच्या सरकारमधील सर्वात तरुण केंद्रीय मंत्री म्हणून त्यांनी आपला ठसा उमटवला. गेल्या काही वर्षांत त्यांना पुन्हा राज्याच्या राजकारणात पाठवले गेले. शाहनवाज हुसेन फिलाहल हे बिहार विधान परिषदेचे सदस्य आहेत.
शाहनवाज हुसेन यांना 2014 च्या लोकसभा निवडणुकीत पराभवाचा सामना करावा लागल्याने मोठा धक्का बसला होता. यापूर्वी 2006 मध्ये भाजपने त्यांना पोटनिवडणुकीच्या माध्यमातून संसदेत आणले होते. 2014 च्या लोकसभा निवडणुकीतील पराभवानंतर पक्षाने 2019 च्या निवडणुकीत तिकीटही दिले नाही. शाहनवाज हुसैन यांनी ज्या जागेवरून निवडणूक लढवली ती जागा भाजपने जेडीयूला दिली होती. मात्र, त्यावेळी जेडीयू एनडीएचा भाग होता.
बिहारमध्ये 2020 च्या विधानसभा निवडणुकीत भाजपने शाहनवाज हुसेन यांना विधान परिषद निवडणुकीसाठी उभे केले होते. शाहनवाज हुसेन जिंकण्यात यशस्वी ठरले आणि मुख्यमंत्री नितीशकुमार यांनी त्यांना उद्योगमंत्री केले. तथापि, 2022 मध्ये भाजपला मोठा धक्का बसला जेव्हा नितीश कुमार यांचा पक्ष जेडीयूने एनडीएशी संबंध तोडून आरजेडीसोबत सरकार स्थापन केले.
बिहारमध्ये जेडीयू आणि एनडीएची युती संपुष्टात आल्यानंतर शाहनवाज हुसेन यांनाही उद्योग मंत्रालय गमवावे लागले. एकेकाळी सत्ता उपभोगणारे शाहनवाज हुसेन आता बिहार विधान परिषदेत विरोधी पक्षाच्या भूमिकेत दिसत आहेत. बिहार हे शाहनवाज हुसेन यांचे मूळ राज्य आहे आणि सुपौल हा त्यांचा गृह जिल्हा आहे.
