जळगाव : मुलीकडे निघालेल्या प्रौढांचा धावत्या रेल्वेतून पडल्याने जागीच मृत्यू झाला. जळगाव तालुक्यातील भादली गावानजीक ही घटना घडली आहे. याबाबत नशिराबाद पोलीस ठाण्यात अकस्मात मृत्यूची नोंद करण्यात आली आहे. नरेश गोकुळप्रसाद परदेशी (५५) रा.गोलाणी कॉम्प्लेक्स, वरणगाव रोड, भुसावळ असे मयताचे नाव आहे.
भुसावळ शहरातील गोलाणी कॉम्प्लेक्स येथे नरेश परदेशी हे आपल्या आई व पत्नी यांच्यासोबत वास्तव्याला होते. बुधवारी ४ ऑक्टोबर रोजी सायंकाळी ते नागपुर येथील मुलीकडे जात असल्याचे सांगून निघाले होते.
त्यानंतर ते नागपूरकडे न जाता भुसावळहून जळगावला येण्यासाठी रेल्वेने प्रवास करत असताना त्याच्या तोल जावून धावत्या रेल्वेतून खाली पडल्याने जागीच मृत्यू झाला. ही घटना रात्री ८ वाजेच्या सुमारास जळगाव तालुक्यातील भादली गावानजीक घडली आहे.
घटनेची माहिती मिळाल्यानंतर नशिराबाद पोलीसांनी घटनास्थळी धाव घेवून पंचनामा केला व मृतदेह जिल्हा शासकीय वैद्यकीय महाविद्यालयात दाखल करण्यात आला. मयताच्या पश्चात पत्नी, आई आणि मुलगा असा परिवार आहे. याबाबत नशिराबाद पोलीसात अकस्मात मृत्यूची नोंद करण्यात आली आहे.
