नवी दिल्ली : रिझर्व्ह बँकेनं आज व्याजदरात वाढ न करून सामान्यांना दिलासा दिला आहे. तर दुसरीकडे आता इंधन कंपन्याही सामान्यांना दिलासा देण्याची शक्यता आहे. जवळपास १३ महिन्यांपासून इंधनाचे दर स्थिर आहेत. मात्र त्यात आता कपात होऊ शकते. सरकारी सूत्रांनी दिलेल्या माहितीनुसार इंधन कंपन्या लवकरच पेट्रोल आणि डिझेलचे दर कमी करू शकतात.
जागतिक कारणांमुळे इंधन कंपन्यांचा झालेला तोटा जवळपास भरून निघाला आहे आणि कंपन्या यापूर्वीच्या स्थितीच्या जवळ पोहोचल्या आहेत. इंधन कंपन्यांनी जारी केलेल्या तिमाहीच्या निकालानंतर याची पुष्टी झाली होती. सरकारी सूत्रांनी दिलेल्या माहितीनुसार इंधन कंपन्यांच्या तिमाही निकालाच्या सकारात्मक परिणामानंतर पेट्रोल आणि डिझेलचे दर आता कमी होण्याची शक्यता आहे.
सूत्रांनी दिलेल्या माहितीनुसार, ऑर्गनायझेशन ऑफ द पेट्रोलियम एक्सपोर्टिंग कंट्रीजच्या म्हणजे ओपेकच्या सदस्यांपैकी एकानं कच्च्या तेलाचं उत्पादनात केलेल्या कपातीचा परिणाम पर्यायी बाजारपेठांमुळे जाणवणार नाही. गेल्या रविवारी, ओपेक प्लस देशांनी त्यांचे नियोजित कच्च्या तेलाच्या उत्पादन कपात कायम ठेवण्याचा निर्णय घेतलाय.
