१०th Result : महाराष्ट्र राज्य माध्यमिक व उच्च माध्यमिक शिक्षण मंडळातर्फे मार्च २०२३ मध्ये घेण्यात आलेल्या इयत्ता दहावीच्या परीक्षेचा निकाल शुक्रवारी, घोषित करण्यात आला. यात मनिष महेश कोकरे याने शंभर टक्के गुण मिळवून कोकण विभागीय मंडळ रत्नागिरी (बोर्डात) मध्ये प्रथम क्रमांक मिळवला आहे.
मनिष कोकरे हा विद्यार्थी लहानपणापासूनच अनेक स्पर्धा परीक्षांच्या गुणवत्ता याद्यांमध्ये झळकला आहे. यापूर्वी इयत्ता पाचवी शिष्यवृत्ती परीक्षेत तालुक्यात पहिला तसेच इयत्ता आठवी शिष्यवृत्ती परीक्षेमध्ये राज्य गुणवत्ता यादीत अकरावा क्रमांक प्राप्त केला होता. इयत्ता सहावी मध्ये बीडीएस परीक्षेमध्ये संपूर्ण देशांमध्ये शंभर पैकी १०० गुण मिळवून प्रथम आला होता. तसेच विज्ञान प्रदर्शनासह अन्य उपक्रमांतही त्यांने यापूर्वी यश मिळविले आहे. मनीष कोकरे याने पुढील करिअर हे मेडिकल सायन्समध्ये करण्याचे निश्चित केले असून त्यासाठी तो लातूर येथे पुढील शिक्षणासाठी गेला आहे. मनीषची आई गृहिणी आहे तर वडील महेश कोकरे हे जिल्हा परिषदेचे प्राथमिक शिक्षक आहेत.
मनिषचे महेश कोकरे यांनी त्याला अनेक शाळाबाह्य परीक्षेलाही प्रोत्साहन दिले होते. त्यावेळीही मनिषने प्रत्येक स्पर्धा परीक्षेत उत्तम यश मिळवले होते. आपल्या यशात शाळेतील सर्व शिक्षक आईवडिल यांचा सिंहाचा वाटा असून यापुढे नीट मध्ये यश मिळवून मेडिकल मध्ये करिअर करायचे आहे असे मनिषने सांगितले. कोकरे कुटुंबीय मूळचे सांगली येथील आहे नोकरीनिमित्त हे कुटुंब दापोली येथे गेले काही वर्षे स्थायिक आहे.
याच ज्ञानदीप विद्यालयातील जिज्ञासा राकेश मुके या विद्यार्थीनीने ९७.८०% गुण मिळवून शाळेत दिव्तीय क्रमांक मिळवला आहे. तसेच चेतन सुनिल तोटावार याने ९७.६०% गुण मिळवून तृतीय क्रमांक मिळवला आहे. ज्ञानदीप विद्यामंदिर दापोलीचा २०१७ चा कोकण विभागीय मंडळ रत्नागिरी मध्ये १०० टक्के गुण प्राप्त करण्याची कु. ईशा प्रशांत शिवलकर हिची परंपरा कुमार मनिष महेश कोकरे याने १०० टक्के गुण मिळवून कायम ठेवली आहे.
या सर्व यशस्वी विदयार्थ्यांचे संस्था अध्यक्षा सरोज मेहता, संचालक सुजय मेहता, रितू मेहता,सुयश मेहता,सुयोग मेहता व सर्व संचालक, मुख्याध्यापक मधुकर मोरे, प्राथमिक विभागाचे मुख्याध्यापक महेश शिंदे व सर्व शिक्षक यांनी अभिनंदन केले आहे.
