पाचोरा : ज्यांना कुणीही नाही अशा निराधारांना मिष्टान्नाने युक्त असणारे अन्नदान करत शिवसेना-उध्दव बाळासाहेब ठाकरे पक्षाच्या ज्येष्ठ नेत्या वैशाली नरेंद्रसिंग सुर्यवंशी यांनी अनोख्या पध्दतीत पाडवा पहाट साजरी केली.
वर्षातील मोठे पावन पर्व असलेला गुढीपाडवा सर्वत्र साजरा करण्यात येत आहे. यातील पाडवा पहाट ही विशेष मानली जात असून यानिमित्त विविध धार्मिक, सामाजिक व सांस्कृतीक कार्यक्रम आयोजीत करण्यात येतात. शिवसेना-उध्दव बाळासाहेब ठाकरे पक्षाच्या ज्येष्ठ नेत्या वैशाली नरेंद्रसिंग सुर्यवंशी यांनी मात्र अतिशय अनोख्या आणि मानवतावादी प्रकारे पाडवा पहाट साजरी केली.
पाचोरा शहरातील आधारवड ही संस्था निराधारांना आधार देण्याचे काम करते. शहरासह परिसरातील अनेक निराधारांना येथे आश्रय मिळालेला आहे. वैशाली सूर्यवंशी यांनी पहाटेच आपल्या सहकार्‍यांसह आधारवड संस्थेतील निराधार स्त्री-पुरूषांना अन्नदानरूपी सेवा केली. यात खीर व बदाम शेकसह अनेक स्वादीष्ट खाद्यपदार्थांचा समावेश होता. लक्षणीय बाब म्हणजे वैशाली सुर्यवंशी आणि त्यांच्या सहकार्‍यांनी स्वत: आग्रह करून खाद्यपदार्थ खाऊ घातले तेव्हा अनेकांना भावना उचंबळून आल्या. या माध्यमातून निराधारांचा गुढीपाडवा खर्‍या अर्थाने गोड झाल्याची भावना त्यांच्या चेहर्‍यावर दिसून आली.
याप्रसंगी वैशाली सुर्यवंशी यांनी आधारवड संस्थेच्या पदाधिकार्‍यांशी संवाद साधतांना उपेक्षितांसाठी ते करत असलेल्या कार्याचे तोंड भरून कौतुक केले. आगामी काळात आपण संस्थेच्या मदतीसाठी तत्पर राहणार असल्याचे देखील त्यांनी आवर्जून नमूद केले.
याप्रसंगी वैशाली सुर्यवंशी यांच्या सोबत कमलताई आर. ओ. पाटील, निधी नरेंद्रसिंग सूर्यवंशी, ज्येष्ठ शिवसैनिक राजू काळे, अनिल सावंत, एडवोकेट दीपक पाटील, दादाभाऊ चौधरी, पप्पू राजपूत, पप्पू जाधव, नामदेव चौधरी, संजय चौधरी, भूषण चौधरी, संदीप जैन, मनोज चौधरी , हरीश देवरे, फकीरचंद पाटील, अतुल चौधरी सह समस्त पदाधिकारी आणि कार्यकर्ते आदी उपस्थित होते.
