मुंबई : मुंबईतील आझाद मैदानावर आता शिंदे गटाचा दसरा मेळावा होणार आहे. या दसरा मेळाव्याचा पहिला टीझर शिंदे गटाकडून जारी करण्यात आला आहे. “शिवसेनेचे एकच तत्व, साहेबांचं हिंदुत्व, साहेबांचं शिष्यत्व! शिवसेनेचा दसरा मेळावा… चलो आझाद मैदान… टीझर प्रकाशित” असं ट्विट नरेश म्हस्के यांनी केलं आहे. या टीझरमध्ये बाळासाहेब ठाकरे यांच्या जुन्या भाषणाची एक ऑडिओ क्लिप आहे. यासोबतच हिंदूहृदयसम्राट बाळासाहेब ठाकरे यांच्या शिवसेनेचा मेळावा… असा उल्लेख देखील करण्यात आला आहे.
शिंदे गटाच्या दसरा मेळाव्याच्या टीझरमध्ये वापरण्यात आलेल्या बाळासाहेबांच्या ऑडिओ क्लिपमध्ये “या मर्दाची टक्कर घेण्याची हिंमत कुणीही करता कामा नये, असं दृश्य साऱ्या हिंदुस्तानात उभं राहिलं पाहिजे. ते चित्र मी हिंदुंच्या आणि हिंदुत्वाच्या रुपाने उभा करतोय” असं म्हटलं आहे. तसेच मुख्यमंत्री एकनाथ शिंदे यांनी देखील “ही फक्त आणि फक्त बाळासाहेबांच्या विचारांची शिवसेना आहे. तुम्हा तमाम शिवसैनिकांची ही शिवसेना आहे” असं म्हटलं आहे.
शिवसेनेत फूट पडल्यानंतर ठाकरे गट आणि शिंदे गट आमने-सामने आले आहेत. दोन्ही गटांकडून स्वतंत्रपणे ‘दसरा मेळावा’ साजरा केला जात आहे. गेल्यावर्षी दसरा मेळाव्यासाठी शिवतीर्थ मैदान मिळावं, यासाठी शिवसेनेच्या दोन्ही गटांनी अटीतटीचे प्रयत्न केले होते. अखेर मुंबई महापालिकेनं ठाकरे गटाला शिवतीर्थ मैदानात सभा घेण्याची परवानगी दिली.
यंदाही दोन्ही गटाने शिवतीर्थ मैदान मिळवण्यासाठी मुंबई महापालिकेकडे परवानगी मागितली. पण यंदाही शिवतीर्थ मैदान ठाकरे गटालाच मिळालं. यानंतर आता शिंदे गटाचा दसरा मेळावा मुंबईतील आझाद मैदानावर होणार आहे. मुंबईतील आझाद मैदानावर २४ ऑक्टोबर रोजी शिंदे गटाचा दसरा मेळावा पार पडणार आहे. सायंकाळी पाच वाजता या कार्यक्रमाला सुरुवात होणार आहे. या मेळाव्यातून मुख्यमंत्री एकनाथ शिंदे काय बोलणार? कुणाला लक्ष्य करणार? याकडे सर्वांचं लक्ष लागलं आहे.
शिवसेनेचे एकच तत्व , साहेबांचं हिंदुत्व , साहेबांचं शिष्यत्व !
शिवसेनेचा दसरा मेळावा ..चलो आझाद मैदान …टिझर प्रकाशित@mieknathshinde @DrSEShinde @Shivsenaofc @News18lokmat @abpmajhatv @zee24taasnews @PTI_News @TV9Marathi @LokshahiMarathi @aajtak @CNN @JaiMaharashtraN… pic.twitter.com/30iQQSO1PM— Naresh Mhaske (@nareshmhaske) October 20, 2023
