बिहारमधील गोपालगंजमध्ये एका मंदिराच्या पुजाऱ्यावर गोळ्या झाडल्याची धक्कादायक घटना समोर आली आहे. मारेकऱ्यांनी पुजाऱ्याला केवळ गोळ्या झाडल्या नाहीत तर त्याचे दोन्ही डोळे आणि प्रायव्हेट पार्टही कापले. शिवमंदिरात सेवा करणारे पुजारी मनोज कुमार हे मृतदेह सापडण्याच्या सहा दिवसांपूर्वी बेपत्ता झाले होते. त्यानंतर पुजाऱ्याचा मृतदेह सापडला असून त्याच्या शरीरावर गंभीर जखमांच्या खुणा आहेत. पुजारी मनोज बेपत्ता झाल्याची तक्रार पोलिसांकडे करण्यात आली, मात्र कुटुंबीय आणि पोलिसांच्या प्रयत्नानंतरही तो सापडला नाही.
पुजाऱ्याच्या मृत्यूची बातमी समजताच ग्रामस्थांमध्ये अस्वस्थता पसरली. त्यांनी पोलिसांवर निष्काळजीपणाचा आरोप केला आणि त्यांच्याशी हाणामारीही झाली. काही वेळातच ग्रामस्थांचा विरोध वाढला. त्यांची निदर्शने रस्त्यावर पोहोचली. यावेळी पोलिसांशी झटापटही झाली. हिंसक जमावाने राष्ट्रीय महामार्गावर दगडफेक केली. पोलिसांवरही दगडफेक केली. भाजपचे माजी प्रमुख आणि माजी विभागीय अध्यक्ष असलेले मृत पुजाऱ्याचे भाऊ अशोक कुमार साह यांनीही पोलिसांच्या कारवाईवर नाराजी व्यक्त केली आहे.
पुजाऱ्याच्या हत्येमागचा हेतू अद्याप स्पष्ट
पोलीस या प्रकरणाचा तपास करत आहेत मात्र अद्याप आरोपींबाबत कोणतीही माहिती मिळालेली नाही. याशिवाय पुजाऱ्याच्या हत्येमागचा हेतूही अद्याप स्पष्ट झालेला नाही. याबाबतही कुटुंबीय व गाव संतप्त झाले असून अधिकाऱ्यांकडे जाब विचारत आहेत. मात्र, पोलिसांनी काही जणांना ताब्यात घेतले आहे.
अनेक पैलूंवरून या प्रकरणाचा तपास सुरू असल्याचे पोलिसांनी सांगितले. जमिनीचा वाद लक्षात घेऊन या घटनेचा तपास सुरू असल्याचे त्यांनी सांगितले. पुजाऱ्याचा काही कौटुंबिक वाद तर होता ना, या दृष्टिकोनातूनही तपास सुरू असल्याचे पोलिसांनी सांगितले.
सीसीटीव्ही फुटेज आले समोर
मंदिराच्या पुजाऱ्याच्या हत्येनंतर कुटुंबात शोककळा पसरली आहे. या प्रकरणी पोलिसांनी केलेल्या कारवाईबद्दल कुटुंबीयांनीही नाराजी व्यक्त केली आहे. मात्र, पुजाऱ्याची हत्या करण्यापूर्वीचे सीसीटीव्ही फुटेज समोर आले आहे. ज्यामध्ये पुजारी मंदिराच्या आवारातून बाहेर पडताना दिसत आहेत. मात्र असे असतानाही पोलिसांना अद्याप कोणताही सुगावा लागलेला नाही. मृतदेह पोस्टमॉर्टमसाठी पाठवण्यात आला असून एफआयआर नोंदवण्यात आला आहे.
