समाजवादी पक्षाने लोकसभा उमेदवारांची तिसरी यादी जाहीर केली आहे. यामध्ये सर्वात मोठे नाव आहे ते शिवपाल सिंह यादव यांचे, ज्यांना बदाऊन लोकसभा मतदारसंघातून उमेदवारी देण्यात आली आहे. याआधी समाजवादी पक्षाने पहिल्या यादीत धर्मेंद्र यादव यांना उमेदवारी दिली होती. समाजवादी पक्षाने जाहीर केलेल्या या तिसऱ्या यादीत लोकसभेच्या पाच जागांसाठी उमेदवारांची नावे जाहीर करण्यात आली आहेत, तर पाच लोकसभा जागांसाठी प्रभारी जाहीर करण्यात आले आहेत.
समाजवादी पार्टीने जाहीर केलेल्या तिसऱ्या यादीत कैरानामधून इक्रा हसन, बरेलीमधून प्रवीण सिंग ऐराज, हमीरपूरमधून अजेंद्र सिंग राजपूत आणि वाराणसीमधून सुरेंद्र सिंग पटेल यांना उमेदवारी देण्यात आली आहे. याशिवाय अमरोहा आणि कन्नौजच्या प्रभारींच्या नावांची घोषणा करण्यात आली आहे. त्यात मेहबूब अली आणि राम अवतार सैनी यांना अमरोहाचे प्रभारी बनवण्यात आले आहे. धर्मेंद्र यादव यांना कन्नौज आणि आझमगडचे प्रभारी बनवण्यात आले आहे.
