सिक्युरिटीज अँड एक्सचेंज बोर्ड ऑफ इंडियाने (SEBI) ने जेन्सोल इंजिनिअरिंगविरुद्ध मोठी कारवाई केली आहे. कंपनीचे प्रवर्तक अनमोल सिंग जग्गी आणि पुनीत सिंग जग्गी यांना कोणतेही संचालक किंवा प्रमुख व्यवस्थापन पद धारण करण्यास आणि कोणत्याही प्रकारचे शेअर्स खरेदी-विक्री करण्यास बंदी घातली आहे.
गेल्या काही दिवसांपासून जेन्सोल इंजिनिअरिंगच्या शेअरमध्ये मोठी घसरण झाली आहे. जेन्सोल इंजिनिअरिंगचा शेअर दररोज घसरत आहे. गेल्या एका वर्षात हा शेअर जवळपास 90%टक्क्यांनी घसरला आहे. आता सेबीने या कंपनीविरुद्ध मोठी कारवाई केली आहे.
सेबीने कंपनीचे प्रवर्तक अनमोल सिंग जग्गी आणि पुनीत सिंग जग्गी यांच्यावर निधी वळवण्याचा आणि खोटे खुलासे केल्याचा आरोप केला आहे. आदेशानुसार, आता हे दोघेही कोणत्याही कंपनीत संचालक किंवा व्यवस्थापनातील महत्त्वाची पदे घेऊ शकणार नाहीत किंवा कोणत्याही प्रकारच्या सुरक्षा बाजारात व्यापार करू शकणार नाहीत.
कंपनीला कोट्यवधी रुपये कुठून मिळाले?
आर्थिक वर्ष 2022 ते आर्थिक वर्ष 2024 दरम्यान, जेनसोलने आयआरईडीए आणि पीएफसी या दोन सरकारी कर्जदारांकडून 977.75कोटी रुपयांचे कर्ज घेतले, ज्याचे उद्दिष्ट 6400 इलेक्ट्रिक वाहने खरेदी करून ती ब्लूस्मार्ट नावाच्या संबंधित कंपनीला भाड्याने देण्याचे होते.
परंतु केवळ 4,704 वाहने खरेदी करण्यात आली, ज्याची किंमत ₹567.73कोटी असल्याचे सांगण्यात आले. अशा परिस्थितीत, ₹ 262.13 कोटी रकमेबद्दल कोणतेही स्पष्टीकरण देण्यात आलेले नाही.
उर्वरित रक्कम प्रवर्तकांशी आणि त्यांच्या नातेवाईकांशी संबंधित संस्थांमध्ये वळवण्यात आली. यामध्ये रिअल इस्टेट खरेदी आणि कुटुंबातील सदस्यांना रोख रक्कम हस्तांतरित करण्यात आली आहे.
स्टॉक स्प्लिटवर बंदी
जेन्सोल इंजिनिअरिंगने अलीकडेच 1:10 स्टॉक स्प्लिटची घोषणा केली होती. सेबीने त्यावरही बंदी घातली आहे. गुंतवणूकदारांच्या हितासाठी हे पाऊल उचलण्यात आल्याचे बाजार नियामकांचे म्हणणे आहे. डिसेंबर 2024 च्या शेअरहोल्डिंग पॅटर्ननुसार, कंपनीकडे 35.34% किरकोळ गुंतवणूकदार होते.
आज बीएसईवर जेन्सोल इंजिनिअरिंगचे शेअर्स 5 टक्क्यांनी घसरून 122.68 रुपये प्रति शेअर झाले आहेत. या वर्षी आतापर्यंत हा शेअर 90% टक्क्यांनी घसरला आहे. आता गुंतवणूकदारांना हा स्टॉक विकून बाहेर पडायचे आहे, परंतु लोअर सर्किटमुळे ते त्यातून बाहेर पडू शकत नाहीत.
