Chhagan Bhujbal : राष्ट्रवादी काँग्रेसचे नेते छगन भुजबळ यांचा अखेर मंत्रिमंडळात समावेश झाला आहे. आज मंगळवारी (२० मे) रोजी राजभवनात राज्यपाल सी.पी. राधाकृष्णन यांनी भुजबळ यांना मंत्रिपदाची शपथ दिली.
भुजबळ हे नाशिक जिल्ह्यातील येवला येथील आमदार असून, ते ओबीसीचे जेष्ठ नेते देखील आहेत. पाच महिन्यांपूर्वी महाराष्ट्रात फडणवीस यांच्या नेतृत्वाखाली महायुतीचे सरकार स्थापन झाले मात्र, भुजबळांना मंत्रिमंडळात स्थान देण्यात आले नव्हते, त्यामुळे ते नाराज होते.
देवेंद्र फडणवीस यांच्या नेतृत्वाखाली सरकार स्थापन झाले तेव्हा ३३ कॅबिनेट आणि ६ राज्यमंत्र्यांनी शपथ घेतली. फडणवीस सरकारमध्ये भाजपचे १९, शिवसेनेचे ११ आणि राष्ट्रवादीच्या कोट्यातील ९ मंत्र्यांचा समावेश होता. अशा परिस्थितीत धनंजय मुंडे यांच्या राजीनाम्यामुळे राष्ट्रवादी काँग्रेसच्या कोट्यातील एक मंत्रिपद रिक्त झाले, जे छगन भुजबळ यांच्या माध्यमातून भरले जात आहे.
छगन भुजबळ हे महाराष्ट्राच्या राजकारणात ओबीसी समाजाचा प्रमुख चेहरा मानले जातात. त्यांनी राज्याचे उपमुख्यमंत्री ते गृहमंत्री अशी अनेक पदे भूषवली आहेत. मुख्यमंत्री देवेंद्र फडणवीस यांनी डिसेंबर २०२४ मध्ये केलेल्या मंत्रिमंडळ विस्तारात स्थान न मिळाल्याबद्दल त्यांनी जाहीरपणे नाराजी व्यक्त केली होती, परंतु आता पाच महिन्यांनंतर धनंजय मुंडे यांच्या राजीनाम्यानंतर ते मंत्रिमंडळात समाविष्ट झाले आहेत.
मंत्री न केल्याबद्दल छगन भुजबळ यांनी दावा केला होता की, नोकरी आणि शिक्षणात मराठा समाजाला आरक्षण देण्याची मागणी करणाऱ्या मनोज जरांगे यांना त्यांनी विरोध केल्यामुळे त्यांना मंत्रिमंडळाबाहेर ठेवण्यात आले. ते म्हणाले की, लोकशाहीमध्ये प्रत्येकाला आपले विचार व्यक्त करण्याचा अधिकार आहे. मंत्रीपदासाठी मला कोणी नाकारले हे मी शोधण्याचा प्रयत्न करत आहे.
