Startup Roadmap Book : मराठी भाषेतील उद्योजकतेविषयी मार्गदर्शन करणाऱ्या पुस्तकांत एक मोलाची भर म्हणजे डॉ. युवराज परदेशी यांचे स्टार्टअप रोडमॅप हे पुस्तक. आजच्या युगात तरुणाई स्टार्टअपच्या दिशेने वळते आहे, पण त्यांच्या वाटचालीसाठी योग्य दिशादर्शकाची कमतरता जाणवते. हीच पोकळी भरून काढण्याचे कार्य हे पुस्तक अत्यंत प्रभावीपणे करते.
डॉ. युवराज परदेशी हे स्वतः एक स्टार्टअप को-फाऊंडर असून, त्यांनी अनेक स्टार्टअप्सना मेंटॉरिंगच्या माध्यमातून घडवले आहे. त्यामुळे त्यांचा अनुभव प्रात्यक्षिक स्वरूपात पुस्तकात उतरलेला आहे. त्यांच्या लेखनशैलीत प्रामाणिकपणा, व्यावहारिक दृष्टिकोन आणि मार्गदर्शनात्मक विचार स्पष्ट दिसून येतो. स्टार्टअप रोडमॅप हे पुस्तक अत्यंत सुबोध आणि टप्प्याटप्प्याने रचलेले आहे. नवउद्योजकांना समजेल अशा शैलीत स्टार्टअप म्हणजे काय, याची मूलभूत संकल्पना स्पष्ट केली आहे. पुस्तकाची भाषा सहजसोप्या मराठीत आहे, जी विद्यार्थ्यांपासून नवउद्योजकांपर्यंत सर्वांनाच समजेल अशी आहे. तांत्रिक संकल्पनांचे मराठीकरण योग्य पद्धतीने करण्यात आले आहे. कुठेही जडजड उद्योगधंद्यांची भाषा नाही; उलट वास्तवदर्शी आणि प्रेरणादायी शैली आहे. पुस्तकातील काही ठळक मुद्द्यांचा उल्लेख करावयाचा म्हटल्यास, स्टार्टअप आणि पारंपरिक व्यवसायातील फरक: दोघांतील दृष्टीकोन, वाढीचे वेग आणि जोखीम यांचे विश्लेषण नेमकेपणाने केले आहे.
मार्केट रिसर्च : कोणत्याही स्टार्टअपच्या यशाचा पाया म्हणजे बाजाराचा अभ्यास. या विभागात आवश्यक टूल्स, पद्धती, आणि अभ्यासाच्या उदाहरणांद्वारे स्पष्ट मार्गदर्शन आहे.
योग्य को-फाउंडरची निवड : स्टार्टअपसाठी सहकाऱ्याची निवड महत्त्वाची असते. यासाठी आवश्यक असलेले गुणधर्म, निवडण्याची पद्धत, आणि संभाव्य अडचणी यांचे सखोल विवेचन आहे.
फंडिंगचे प्रकार : बूटस्ट्रॅपिंगपासून ते व्हेंचर कॅपिटलपर्यंत विविध फंडिंगचे मार्ग, त्यांचे फायदे-तोटे, आणि ते मिळवण्यासाठीच्या टप्प्यांचे व्यवस्थित स्पष्टीकरण देण्यात आले आहे.
इन्क्यूबेटर्स आणि इन्व्हेस्टर्स : स्टार्टअप इकोसिस्टममधील महत्त्वाचे घटक जसे की, इन्क्यूबेटर्स, एंजल इन्व्हेस्टर्स, व्हेंचर कॅपिटलिस्ट आदींच्या कार्यपद्धती आणि त्यांचा उपयोग कसा करून घ्यावा यावर आधारित माहिती समर्पक आहे.
या पुस्तकाचे सर्वांत वैशिष्ट्यपूर्ण अंग म्हणजे त्यासोबत देण्यात आलेला एआय चॅटबॉट. वाचकाने पुस्तक वाचून झाल्यानंतर त्यातील कोणत्याही संकल्पनेबद्दल, टप्प्यांबद्दल किंवा संधींबद्दल शंका विचारता येते. हे मराठीतले पहिले पुस्तक आहे ज्याला स्वतःचा एआय चॅटबॉट देण्यात आला आहे, ही निश्चितच एक क्रांतिकारी बाब आहे. हे वैशिष्ट्य वाचकांना इंटरॲक्टिव्ह अनुभव देते व दीर्घकालीन मार्गदर्शन पुरवते.
स्टार्टअप रोडमॅप हे केवळ एक पुस्तक नाही, तर नवउद्योजकासाठी एक मार्गदर्शक ग्रंथ आहे. स्टार्टअपची संकल्पना, नियोजन, अंमलबजावणी, आणि वाढ यावर समग्र दृष्टिकोन देणारे हे पुस्तक मराठीतून लिहिले गेलेले असल्यामुळे ग्रामीण आणि निमशहरी भागातील तरुणांनाही ते सहज उपलब्ध होईल.
डॉ. युवराज परदेशी यांनी नव्या युगातील उद्योजकतेसाठी हे एक मौल्यवान साधन मराठी वाचकांना दिले आहे, यात शंका नाही. हे पुस्तक प्रत्येक तरुण उद्योजक, स्टार्टअपबद्दल विचार करणारा विद्यार्थी आणि मोठी स्वप्न पाहणाऱ्या आजच्या तरुणाईला दिशादर्शक ठरले, याची खात्री आहे.
