MLA Chandrakant Raghuvanshi : नंदुरबार : शिवसेनेचे जेष्ठ नेते चंद्रकांत रघुवंशी यांनी नुकतीच विधान परिषद सदस्यत्वाची शपथ घेतली. त्यानंतर त्यांचे प्रथमच नंदुरबारमध्ये आगमन झाले. या वेळी नंदुरबारकरांनी त्यांचे जंगी स्वागत केले. ४० जेसीबी उभे करुन त्यांच्यावर पुष्पवृष्टी करण्यात आली. गगनभेदी फटाक्यांची आतषबाजी, आदिवासी नृत्य पथक व डीजेवरील गाण्यांनी नंदुरबार शहर दणाणून गेले. या अभूतपूर्व स्वागताचा सोहळ्यासाठी जिल्ह्याभरातून नागरीक मोठ्या संख्येने आले होते.
आमदार चंद्रकांत रघुवंशी यांनी विधान परिषद सदस्यत्वाची शपथ घेतली. त्यांचे नाशिक, धुळे , दोंडाईचा, रनाळे असे प्रत्येक ठिकाणी जंगी स्वागत करण्यात आले. या प्रसंगी पालघरचे आमदार राजेंद्र गावित, आमदार आमशा पाडवी, आमदार मंजुळा गावित, शिवसेना जिल्हाप्रमुख ॲड. राम रघुवंशी, विजय पराडके आदी उपस्थित होते.
आमदार चंद्रकांत रघुवंशी म्हणाले की, खोटे बोलुन कोणीही जास्त दिवस जनतेची दिशाभूल करु शकत नाही. आम्ही जनतेचे काम करतो. ठेकेदार पोसत नाहीत. ३० वर्ष आमदार असणाऱ्यांनी शहराचा विकासात काय योगदान दिले याचे आत्मचिंतन करावे. आता पालिका निवडणूकीसाठी शहरातील गल्लोगल्लीत जावुन नागरिकांना आस्थेवाईकपणे विचारपूस करत असले तरी ते खोटे असल्याचे जनतेला माहित असल्याने प्रतिसाद मिळत नाही. कोणीही सत्तेचा माज करु नये. सत्तेचा माज करीत आम्हाला माजी हिणवणाऱ्यांचा परिवारातच आज सर्व माजी झाले आहेत.
माजी मंत्री डॉ. गावितांनी गायी वाटप करताना त्यात पैसे घेतल्याचा आरोप आमदार रघुवंशी यांनी केला. तसेच या प्रकाराची त्रयस्थ यंत्रणेकडून चौकशी करण्याची मागणीदेखील केल्याचे आ.रघुवंशी यांनी सांगितले.
तत्कालिन मुख्यमंत्री एकनाथ शिंदे यांनी मला दिलेला शब्द पाळला. नंदुरबार-धुळे जिल्ह्यात शिवसेनेची ताकद वाढली आहे. येत्या काळामध्ये स्थानिक स्वराज्य संस्थांमध्ये विरोधकांचा सुपडा साफ करुन शिवसेनेचा भगवा फडकविणार असल्याचा विश्वास आ.रघुवंशी यांनी व्यक्त केला. येत्या ३१ मार्च रोजी नंदुरबारमध्ये उपमुख्यमंत्री एकनाथ शिंदे यांची सभा होणार असल्याचे आ.रघुवंशी यांनी सांगितले.
आ.आमश्या पाडवी यांनी सांगितले की, चंद्रकांत रघुवंशी तीन वर्षे नव्हे तर ९ वर्ष आमदार राहणार आहेत. शिवसेनेचे आज जिल्ह्यात दोन आमदार झाले असून येत्या काळात शिवसेनेची ताकद आणखी वाढणार आहे. पालघरचे आ. राजेंद्र गावित यांनी नंदुरबार जन्मभूमी असल्याचा अभिमान असल्याचे सांगितले. तसेच चंद्रकांत रघुवंशी नशिबान असल्याचेही सांगितले. आ.मंजुळा गावित यांनी आमचे नेते आधी काम करतात मग बोलतात असे सांगितले. शिवसेना जिल्हा प्रमुख ॲड. राम रघुवंशी यांनीही विरोधकांवर टिका केली. सुत्रसंचलन प्रा.डॉ.माधव कदम यांनी केले.
