---Advertisement---
जळगाव : रिक्षातून प्रवास करणाऱ्या एका तरुणाला चाकूचा धाक दाखवून लुटल्याचा प्रकार खोटे नगर स्टॉपजवळ घडला. याप्रकरणी जळगाव तालुका पोलीस स्टेशनला जगदिश भालचंदद्र येवले यांच्या फिर्यादीनुसार ३ जणांविरुद्ध गुन्हा दाखल करण्यात आला आहे.
जगदिश भालचंदद्र येवले (वय ३७) हे खोटे नगर येथे आपल्या कुटुंबासोबत वास्तव्याला आहेत. त्यांचा आईस्क्रीम पार्लरचा व्यवसाय आहे. ते रविवारी (१४ सप्टेंबर) दुपारी साडेतीन वाजेच्या सुमारास दुकानावर जाण्याकरीता खोटेनगर स्टॉपवर रिक्षाची वाट पाहत उभे होते. यावेळी बांभोरीकडून येणाऱ्या रिक्षाला त्यांनी हात दिला. रिक्षा चालकाने रिक्षा थांबवून दादावाडी जाण्यास होकार दिल्याने जगदिश येवले हे रिक्षात बसले. यावेळी अगोदर रिक्षात दोन प्रवासी बसलेले होते.
येवले हे रिक्षात बसत असतांना रिक्षात असलेल्या एका व्यक्ती खाली उतरली. त्याने माझ्या पायाला दुखापत झाली असून त्याने येवले यांना मध्यभागी बसवले. रिक्षा खोटेनगर स्टॉपजवळून काही अंतरावर गेल्यानंतर रिक्षात बसलेल्या व्यक्तींनी येवले यांना धारदार चाकूचा धाक दाखवून त्यांच्या खिशातील १८ हजारांची रोकड जबरीने काढून घेतली. त्यानंतर येवले यांना रिक्षातून उतरवून ते चोरटे तेथून पसार झाले. सहा दिवसानंतर त्यांनी तालुका पोलिसात धाव घेत तक्रार दिली. त्यानुसार अज्ञात चोरट्यांविरुद्ध गुन्हा दाखल करण्यात आला आहे.
