पुणे : पुणेमधून एक धक्कादायक घटना उघडीस आली आहे. पाच वर्ष रिलेशनशिपमध्ये असतानाही संबंधित तरुणाने तरुणीशी लग्न करण्यास नकार दिला. या कारणावरुन एका तरुणीने इमारतीच्या टेरेसवरून उडी मारून आत्महत्या केल्याची घटना घडली आहे. या घटनेनं शहरात एकच खळबळ उडाली आहे. या प्रकरणी तरुणीच्या भावाने दिलेल्या फिर्यादीवरून निखिल साबळे (रा. मोरेवस्ती ता.दौंड जि. पुणे) या तरुणावर आत्महत्येस प्रवृत्त केल्याचा गुन्हा दाखल झाला आहे.
पोलिसांनी दिलेल्या माहितीनुसार, फिर्यादीची बहीण साक्षी गायकवाड ही दौंड येथे एका कंपनीत काम करत होती. तिचे निखिल साबळे या तरुणाशी पाच वर्षांपासून प्रेमसंबंध होते. मात्र, फिर्यादीला आपली बहीण थोडी टेन्शनमध्ये असल्याचं दिसलं. भावाने बहिणीला विचारलं की, “काय झालं?” त्यावर तिने सांगितलं की, “माझं निखिल साबळे याच्या सोबत गेले पाच वर्षांपासून प्रेमसंबंध आहेत. मला त्याच्याशी लग्न करायचं आहे. पण तो माझ्या सोबत लग्न करण्यास नकार देतोय. मी त्याला वारंवार माझ्यासोबत लग्न कर असं म्हणत आहे. परंतु तो लग्न करण्यास तयार नाही. त्यामुळे माझी जगण्याची इच्छा राहिली नाही”, असं सांगितलं.
नंतर त्याने तिला समजवण्याचा प्रयत्न केला. मात्र, दुसऱ्या दिवशी १२ मार्च म्हणजे आज सकाळी फिर्यादी झोपेत असताना दरवाजा बाहेरून बंद असल्याचे त्याच्या लक्षात आले. त्याने घरात जाऊन पाहिले असता त्याला बहीण साक्षी ही घरात दिसली नाही. त्याने शेजाऱ्यांच्या मदतीने दरवाजा उघडला. त्यावेळी त्याने टेरेसवरून खाली पाहिले तर त्याला साक्षी रक्तबंबाळ अवस्थेत पडल्याचे दिसले. तिला पुढील उपचारासाठी दवाखान्यात दखल केले असता डॉक्टरांनी तिला मृत घोषित केलं.
त्यामुळे आरोपी निखिल साबळे याने साक्षी हिच्यासोबत लग्न करण्यास नकार देऊन तिला आत्महत्या करण्यास प्रवृत्त केलं असल्याचं फिर्यादीत म्हटलं आहे. याबाबत दौंड पोलीस ठाण्यात गुन्हा दाखल करण्यात आला असून अधिक तपास दौंड पोलीस करत आहेत.
