देगलूर : स्पर्धा परीक्षेची तयारी करणाऱ्या एका २४ वर्षीय तरुणीने गळफास घेत आत्महत्या केली. ही घटना देगलूर रस्त्यावरील सिद्धेश्वर मंगल कार्यालयासमोरील शेतात मंगळवार, ११ मार्च रोजी सकाळी उघडकीस आली. सुनिता चंद्रकांत होनलवाड (२४) असे मृत तरुणीचे नाव आहे.
देगलूर शहरातील भोईगल्ली भागात चंद्रकांत गंगाराम होनलवाड (६२) हे मजुरी कुटुंबाचे उदरनिर्वाह करतात. त्यांना दोन मुले, तीन मुली असा परिवार आहे. त्यांची तिसरी मुलगी सुनिता ही देगलूर महाविद्यालयातून बी.ए.ची डिग्री पूर्ण करून स्पर्धा परीक्षेची तयारी करीत होती.
दरम्यान, सोमवार, १० रोजी दुपारी सुनिता कपडे खरेदीसाठी घरातून बाहेर पडली. रात्री उशिरापर्यंत घरी न परतल्याने घरच्यांनी नातेवाईकासह इतरत्र शोध घेतला मात्र, ती कुठेही मिळून आली नाही. मंगळवार, ११ रोजी सकाळी मॉर्निंग वॉकला गेलेल्या नागरिकांच्या नजरेत ही घटना दिसून आली.
पोलिसांनी घटनेचा पंचनामा केला. शिवविच्छेदनानंतर मृतदेह नातेवाईकांच्या स्वाधीन करण्यात आला. त्यानंतर शोकाकुल वातावरणात तिच्यावर अंत्यसंस्कार करण्यात आले. या प्रकरणाचा पुढील तपास पोलीस निरीक्षक मारुती मुंडे हे करीत असल्याचे सांगण्यात आले.
