---Advertisement---
जळगाव : शेतमजुरांची वाहतूक करणाऱ्या रिक्षाला जीपने धडक दिल्याने २२ जण जखमी झाले. यापैकी २ जण गंभीर आहेत. हा अपघात अमळगाव-जळोद रस्त्यावर घडला.
चोपडा तालुक्यातील बुधगाव येथून एकाच रिक्षामध्ये (एमएच १९ बीजे ४३६५) सुमारे १६ शेतमजूर सकाळी साडेसात वाजेच्या सुमारास अमळगावकडे आणले जात होते. त्यावेळी अमळगावकडून जळोदकडे जाणाऱ्या जीपवरील (एमएच १९ सीझेड २५२२) चालक पवन तुकाराम बाविस्कर याने जोरात धडक दिल्याने रिक्षातील काही प्रवासी रस्त्यावर फेकले गेले व काही रिक्षात अडकले.
या अपघातात रिक्षात बसलेले विकास भिला कोळी (वय ३५), सचिन कैलास शिरसाठ (वय २२), उमेश कैलास शिरसाठ (वय १९), रघुनाथ साहेबराव शिरसाठ (वय ५५), वैशाली रवींद्र कोळी (वय २७), नंदा विकास कोळी (वय २८), मुक्ताई लीलाधर भोई (वय १७), संगीता बळीराम कोळी (वय ३५), कल्पना रघुनाथ कोळी (वय ४७), रिक्षाचालक योगेश भिका कोळी (वय ३१, सर्व रा. बुधगाव) यांना अमळनेर येथील खासगी रुग्णालयात दाखल करण्यात आले. जखमी प्रतिभा कैलास कोळी व कैलास नवल कोळी यांना धुळे येथे रवाना करण्यात आले.
सुवर्णा विलास कोळी (वय ३५) व प्रांजल विलास कोळी (वय १६) यांना अमळनेर येथे खासगी रुग्णालयात दाखल करण्यात आले. जीपचा चालक पवन तुकाराम बाविस्कर, शीतल पवन बाविस्कर, मीराबाई बाविस्कर तसेच अशोका व प्रांतल कोळी या बालकांना धुळे येथील खासगी रुग्णालयात दाखल केले. रेखाबाई भरत शिरसाठ (वय ४५), सुंदरबाई उत्तम कोळी (वय ५३), जनाबाई निंबा साळुंखे (वय ७५) यांना ग्रामीण रुग्णालयात दाखल केले आहे.
घटनेचे वृत्त कळताच पोलिस निरीक्षक दत्तात्रय निकम, पोलिस उपनिरीक्षक भगवान शिरसाठ, हे.कॉ. संदेश पाटील, राहुल पाटील, योगेश बागुल घटनास्थळी पोहचले होते. पथकाकडून प्राथमिक पंचनामा झाल्यानंतर इतर जखमींना उपचारासाठी रवाना करण्यात आले.
