ACT 2024 : पॅरिस ऑलिम्पिक 2024 मध्ये ऐतिहासिक कांस्यपदक जिंकल्यानंतर प्रथमच मैदानात उतरलेल्या भारतीय हॉकी संघाने दमदार कामगिरी केली. महिन्याभरापूर्वी पॅरिसमध्ये झालेल्या सामन्यात स्पेनला हरवून कांस्यपदक जिंकणाऱ्या टीम इंडियाने आशियाई चॅम्पियन्स ट्रॉफीमध्ये शानदार सुरुवात केली.
हरमनप्रीत सिंगच्या नेतृत्वाखालील भारतीय संघाने पहिल्याच सामन्यात यजमान चीनचा 3-0 असा पराभव करत पाचव्यांदा या स्पर्धेचे विजेतेपद पटकावण्याच्या मोहिमेची यशस्वी सुरुवात केली. टीम इंडियाचा पुढचा सामना सोमवारी ९ सप्टेंबरला जपानशी होणार आहे.
ही स्पर्धा रविवार, 8 सप्टेंबरपासून चीनमधील हुलुनबीर येथे सुरू झाली असून यामध्ये भारतासह 6 संघ सहभागी आहेत. यामध्ये पाकिस्तानचाही समावेश आहे. ही स्पर्धा राऊंड रॉबिन पद्धतीने खेळवली जात आहे. म्हणजेच प्रत्येक संघ इतर संघांविरुद्ध प्रत्येकी एक सामना खेळेल.
टीम इंडियाने गेल्या वर्षी या स्पर्धेचे जेतेपद पटकावले होते आणि आता आपले विजेतेपद राखण्यासाठी दमदार सुरुवात केली आहे. जपान-दक्षिण कोरियाचा सामना ५-५ असा बरोबरीत सुटला, तर मलेशिया आणि पाकिस्तानचा सामनाही २-२ असा बरोबरीत सुटला.
तीन क्वार्टरमध्ये तीन गोल
भारतीय संघाने सुरुवातीपासूनच आक्रमण सुरू ठेवले आणि पहिल्या क्वार्टरमध्येच गोल नोंदवून आघाडी घेतली. 14व्या मिनिटाला सुखजीतच्या स्टिकमधून चेंडू विचलित होऊन चीनच्या गोलपोस्टमध्ये घुसला आणि भारताचा पहिला गोल झाला. त्याचप्रमाणे दुसऱ्या क्वार्टरमध्येही भारताने आघाडी दुप्पट केली. यावेळी उत्तम सिंगने टीम इंडियासाठी गोल करत स्थान मजबूत केले. तिसऱ्या क्वार्टरमध्येही परिस्थिती बदलली नाही आणि भारताने पुन्हा एक गोल केला. तिसऱ्या क्वार्टरमध्ये अभिषेकने भारताचा तिसरा गोल केला, जो शेवटी निर्णायक ठरला. चौथ्या क्वार्टरमध्ये भारताने एकही गोल केला नाही पण चीनचे काही प्रयत्न हाणून पाडले आणि सामना 3-0 असा जिंकला.
पाठकची दमदार कामगिरी
प्रशिक्षक क्रेग फुल्टन यांच्या या संघात बहुतेक तेच खेळाडू समाविष्ट होते ज्यांनी पॅरिसमध्ये कांस्यपदक जिंकले होते, त्यामुळे त्यांच्याकडून येथेही चांगली कामगिरी अपेक्षित होती. मात्र, अनुभवी गोलरक्षक पीआर श्रीजेशच्या निवृत्तीनंतर संघ पहिल्यांदाच मैदानात उतरला होता, त्यामुळे त्याची जागा घेणारा कृष्ण बहादूर पाठक याच्याकडे चांगली कामगिरी करू शकतो का, याकडे सर्वांचे लक्ष लागले होते. श्रीजेश. दीर्घकाळ संघाचा भाग असलेल्या पाठकने निराश न होता तो आता टीम इंडियाचा नंबर-1 गोलकीपर बनण्यास सज्ज असल्याचे दाखवून दिले.
