---Advertisement---
जळगाव : नाशिक परिक्षेत्राचे विशेष पोलीस महानिरीक्षक दत्तात्रय कराळे यांनी स्थानिक गुन्हे शाखेचे तत्कालीन पोलीस निरीक्षक संदीप पाटील यांना निलंबित केले, जिल्हा नियोजन समितीच्या बैठकीत आमदार मंगेश चव्हाण यांनी पोलीस निरीक्षक संदीप पाटील यांच्यावर गंभीर आरोप केले होते. आ. चव्हाण यांनी बैठकीत एक ऑडियो क्लिप ऐकवून संदीप पाटील यांनी एका महिलेवर लग्नाचे आमिष दाखवून अत्याचार केल्याचा आरोप केला होता. या घंटनेनंतर पोलीस निरीक्षक संदीप पाटील यांच्यावर गुन्हा दाखल करण्याचे आदेश देण्यात आले होते.
मात्र, ही महिला तक्रार न देताच पोलीस स्टेशनमधून निघून गेली. यामुळे गुन्हा दाखल होऊ शकला नव्हता. परंतु, या प्रकरणाची जिल्हा पोलिस अधीक्षक डॉ. महेश्वर रेड्डी यांनी दखल घेतली. त्यांनी विशेष पोलीस महानिरीक्षक दत्तात्रय कराळे यांच्याकडे सविस्तर अहवाल सादर केला. त्यानंतर संदीप पाटील यांच्यावर निलंबनाची कारवाई करण्यात आली. या प्रकरणात आता अपर पोलिस अधीक्षक अशोक नखाते यांच्या मार्फत खातेअंतर्गत प्राथमिक चौकशी होणार असल्याची माहिती दत्तात्रय कराळे यांनी माध्यमांना दिली आहे.
जळगाव स्थानिक गुन्हे शाखेचे पोलीस निरीक्षक संदीप पाटील यांनी २०२३ मध्ये महिलेला एका गुन्ह्यासंबंधी मदत केली. त्यानंतर पीडित महिलेशी मैत्री केली. यानंतर या महिलेला लग्नाचे अमिष दाखवून वेगवेगळ्या ठिकाणी घेवून जात अत्याचार केला, असा आरोप आमदार मंगेश चव्हाण यांनी केला होता.
तसेच पीडित महिलेने संदीप पाटील यांची वरिष्ठांकडे तक्रार करेल असे सांगितले असता, संदीप पाटील यांनी महिलेला एसपी, आयजी, डीजी यांना मी घाबरत नाही, पालकमंत्री माझ्या खिशात आहे, आणि तू जर आमदाराकडे गेली तर त्यांना देखील गोळ्या घालून मारुन टाकेल, अशी धमकी दिल्याची कॉल रेकॉर्डीग देखील आमदार मंगेश चव्हाण यांनी जिल्हा नियोजन समितीच्या बैठकीत ऐकवल्याने एकच खळबळ उडाली होती.
मात्र, महिलेने ऐनवेळी तक्रार देण्यास नकार दिल्यामुळे हे प्रकरण शांत झाले होते. परंतु आमदार मंगेश चव्हाण यांनी पोलीस अधीक्षक डॉ. महेश्वर रेड्डी यांची भेट घेत याबाबत कारवाईची मागणी केली होती. जर एक पोलीस अधिकारी एका लोकप्रतिनिधीला गोळ्या घालण्याची भाषा करत असेल तर सर्वसामान्यांचे काय?, असा प्रश्न त्यांनी उपस्थित केला होता. त्यानंतर याविषयी नैतिकतेला सोडून कृत्य केल्याचा अहवाल जिल्हा पोलीस अधीक्षक डॉक्टर महेश्वर रेड्डी यांनी विशेष पोलीस महानिरीक्षक दत्तात्रय कराळे यांच्याकडे पाठवला होता. त्यानंतर त्यांनी संदीप पाटील यांच्या निलंबनासह खातेअंतर्गत चौकशीचे आदेश काढले आहेत.
