तरुण भारत लाईव्ह | जळगाव : एरंडोल तालुक्यातील खडके येथील कै.य.ब.पाटील शिक्षण प्रसारक मंडळ संचलित मुलींच्या बालगृहाची मान्यता अखेर रद्द करण्यात आली आहे. राज्याचे महिला व बाल विकास आयुक्त डॉ. प्रशांत नारनवरे यांनी याबाबतचे आदेश जारी केले आहेत.
खडके येथील या बालगृहातील बाल लैंगिक अत्याचाराची सखोल चौकशी करण्यासाठी पाच सदस्यीय समिती स्थापन करण्यात आली असून या समितीला ३ ऑगस्ट पर्यंत अहवाल सादर करण्याचे निर्देश देण्यात आले आहेत.
खडके येथील बालगृहातील लैंगिक अत्याचार प्रकरणी बालगृहाचे काळजीवाहक गणेश पंडीत, अधीक्षिका अरुणा पंडीत आणि संस्थेचे सचिव भिवाजी पाटील यांच्याविरुध्द २६ जुलै रोजी एरंडोल पोलीस ठाण्यात गुन्हा दाखल करण्यात आला आहे.
या संपूर्ण प्रकरणाची सखोल चौकशी करण्यासाठी प्रेमा घाडगे – बाल विकास प्रकल्प अधिकारी, खार सांताक्रुझ नागरी प्रकल्प, मुंबई उपनगर यांच्या अध्यक्षतेखाली पाच सदस्यीय विशेष तपासणी समिती गठित करण्यात आली आहे. या समितीने तीन दिवसांच्या आत अहवाल सादर करण्याचे आदेश महिला व बाल विकास उपायुक्त राहूल मोरे यांनी दिले आहेत.
