जळगाव : अवैध गौण खनिज उत्खनन व वाहतूक करताना वाळूने भरलेले डंपर महसूल पथकाने पकडले. मात्र, महसूल पथकाला पाहून वाहन चालक हा मजुरांसह पळ काढला. भुसावळ तालुक्यातील जोगलखेडा परिसरात वाघुर नदीपात्रात हा प्रकार घडला. पोलिसांनी साकेगाव ग्रामस्थांच्या मदतीने डंपर ताब्यात घेऊन भुसावळ तहसील कार्यलय आवारात जमा केले.
जिल्हाधिकारी आयुष प्रसाद यांनी वाळू माफियांविरुद्ध कंबर कसल्याने सध्या वाळू माफियांचे धाबे दणाणले आहे. रविवारी एका डंपरमधून अवैधरित्या वाळूची उत्खनन व वाहतूक केली जात होती. उपविभागीय अधिकारी जितेंद्र पाटील व तहसीलदार निता लबडे यांच्या मार्गदर्शनाखालील संयुक्त पथक जोगलखेडा भागात वाघुर नदीपात्रातुन अवैध गौण खनिज उत्खनन व वाहतूक तपासणीसाठी गस्तीवर होते.
त्यावेळी साकेगाव जोगलखेडा रस्त्यावर मनोज परदेशी (रा. साकेगाव) यांच्या मालकीचे वाहन (एमएच १९, जे ३९५१) साकेगावच्या दिशेने येत होते. वाहन चालकाने पथक दिसताच वाहन रस्त्यावर थांबून मजुरासह पळून गेला. त्यानंतर तहसिलदारांच्या माहितीवरून घटनास्थळी तत्काळ पोलीस मदत पाठवून वाहन तपासले असता त्यात वाळू वाहतूक केली जात असल्याचे आढळून आले.
त्यानुसार वाहन व वाहनतील गौण खनीजाचा पंचनामा केला असता, वाहनात अंदाजे २ ब्रास वाळू होती. पथकातील कर्मचाऱ्यांनी वाहन ताब्यात घेऊन साकेगाव ग्रामस्थांच्या मदतीने ते तहसील कार्यलय आवारात जमा केले आहे.
