ऑस्ट्रेलिया क्रिकेट संघाने रविवार, ५ जानेवारी रोजी सिडनी येथे झालेल्या पाचव्या कसोटी सामन्यात भारतीय संघाला ६ विकेट्सने पराभूत करत बॉर्डर-गावसकर ट्रॉफी ३-१ अशा फरकाने जिंकली. या विजयासह ऑस्ट्रेलियाने आयसीसी वर्ल्ड टेस्ट चॅम्पियनशीप २०२३-२५ (WTC 2023-25) स्पर्धेच्या अंतिम सामन्यात प्रवेश पक्का केला आहे. या पराभवासह भारताचे आव्हान मात्र संपुष्टात आले असून, सलग तिसऱ्यांदा भारतीय संघ अंतिम फेरी गाठण्यात अपयशी ठरला आहे.
सिडनी कसोटीत भारताने पहिल्या डावात १८५ धावा केल्या होत्या, तर ऑस्ट्रेलियाने १८१ धावा करत भारताला केवळ ४ धावांची आघाडी मिळू दिली. दुसऱ्या डावात भारताने १५७ धावांचे योगदान दिल्याने ऑस्ट्रेलियासमोर १६२ धावांचे आव्हान ठेवले. मात्र, ऑस्ट्रेलियाने २७ षटकांत ४ विकेट्स गमावत हे लक्ष्य सहज पूर्ण केले.
या विजयासह ऑस्ट्रेलियाने सलग दुसऱ्यांदा टेस्ट चॅम्पियनशीपच्या अंतिम फेरीत स्थान मिळवले आहे. ऑस्ट्रेलियाने यापूर्वी WTC २०२३ च्या अंतिम सामन्यात भारताला पराभूत करत विजेतेपद पटकावले होते. यंदाच्या WTC २०२३-२५ स्पर्धेच्या अंतिम सामन्यात ऑस्ट्रेलियासमोर दक्षिण आफ्रिकेचे आव्हान असणार आहे. हा सामना जूनमध्ये लॉर्ड्सच्या ऐतिहासिक मैदानावर खेळवण्यात येणार आहे.
भारताने मालिकेतील पहिला सामना जिंकून चांगली सुरुवात केली होती, मात्र पुढील सामन्यांमध्ये ऑस्ट्रेलियाने वर्चस्व राखत मालिकेवर कब्जा केला. दुसऱ्या आणि चौथ्या सामन्यात विजय मिळवत, तर तिसरा सामना अनिर्णित ठेऊन, पाचव्या सामन्यात दणदणीत विजय मिळवत ऑस्ट्रेलियाने मालिका ३-१ ने जिंकली.
ऑस्ट्रेलियाच्या या विजयामुळे त्यांच्यासाठी विजेतेपद कायम राखण्याची संधी निर्माण झाली आहे, तर भारतीय संघाला या पराभवाचा अभ्यास करत पुढील धोरणांवर लक्ष केंद्रित करावे लागणार आहे.
