Retired railway employee : रेल्वेने निवृत्त कर्मचाऱ्यांना आणखी एक संधी देण्याचा निर्णय घेतला आहे. अर्थात निवृत्त कर्मचाऱ्यांना रेल्वेमधील नॉन-राजपत्रित म्हणजेच लहान पातळीवरील रिक्त जागेवर कंत्राटी पद्धतीने पुन्हा काम करता येणार आहे.
नवीन नियमानुसार, निवृत्त कर्मचाऱ्यांना वेतन स्तर-१ ते वेतन स्तर-९ पर्यंतच्या रिक्त पदांवर पुन्हा नियुक्ती देता येणार आहे. आता निवृत्त कर्मचारी त्याच्या निवृत्ती पदाच्या तीन स्तरांपेक्षा कमी पदावरही पुन्हा काम करण्यासाठी अर्ज करू शकतो.
उदाहरणार्थ, जर एखादा कर्मचारी वेतन स्तर-६ पासून निवृत्त झाला असेल, तर त्याला स्तर-६, स्तर-५, स्तर-४ आणि स्तर-३ पर्यंतच्या पदांसाठी निवडता येणार आहे.
रेल्वेने असेही स्पष्ट केले आहे की त्याच स्तरावरून निवृत्त झालेल्यांना प्राधान्य दिले जाईल, म्हणजेच ज्या स्तरावर पद रिक्त आहे त्या स्तरावरून निवृत्त झालेल्या व्यक्तीला पहिली संधी मिळेल. जर असे कर्मचारी उपलब्ध नसतील, तरच उच्च स्तरावरून निवृत्त झालेल्या लोकांना संधी मिळेल.
आता विभागीय रेल्वे व्यवस्थापक (DRM) यांना विभागीय स्तरावर (जसे की झोन किंवा विभागात) निवृत्त कर्मचाऱ्यांची भरती करण्याचा अधिकार असेल. रेल्वे मुख्यालयातील भरतीचा निर्णय अजूनही महाव्यवस्थापक (GM) घेतील. संपूर्ण रेल्वे झोनमध्ये किती निवृत्त कर्मचाऱ्यांना पुन्हा कामावर घ्यावे हे महाव्यवस्थापक ठरवतील.
आवश्यक अटी काय ?
ही नियुक्ती खरी गरज असेल तेव्हाच केली जाईल.
निवृत्त कर्मचाऱ्यांना सखोल चौकशी आणि विचारविनिमयानंतरच परत घेतले जाईल.
हा नवीन नियम जारी झाल्यापासून लागू होईल.
रेल्वे बोर्डाच्या मान्यतेने आणि वित्त विभागाच्या संमतीने हा आदेश जारी करण्यात आला आहे.
रेल्वेने निवृत्त कर्मचाऱ्यांना पुन्हा काम करण्याची संधी देऊन कर्मचाऱ्यांची कमतरता भरून काढण्याचा प्रयत्न केला आहे. यामुळे रेल्वेचे कामकाज देखील सुधारेल आणि अनुभवी कर्मचाऱ्यांनाही आणखी एक संधी मिळेल.
