देशातील कोट्यवधी कर्मचारी भविष्य निर्वाह निधी संघटनेच्या (ईपीएफओ) सदस्यांसाठी मोठा दिलासा देणारी बातमी समोर आली आहे. लवकरच पीएफचे पैसे थेट UPI (यूपीआय) किंवा ATM (एटीएम) द्वारे काढणे शक्य होणार आहे. ‘फायनान्शिअल एक्सप्रेस’च्या अहवालानुसार, सरकार या प्रक्रियेला सुलभ करण्याच्या दृष्टीने महत्त्वाची पावले उचलत आहे.
कर्मचारी भविष्य निर्वाह निधी संघटनेने (ईपीएफओ) या सुविधेसाठी संपूर्ण आराखडा तयार केला असून, ही सुविधा लागू करण्यासाठी नॅशनल पेमेंट्स कॉर्पोरेशन ऑफ इंडिया (NPCI) सोबत चर्चा सुरू आहे. सर्व काही नियोजनानुसार पार पडल्यास, पुढील २-३ महिन्यांत ही सुविधा UPI प्लॅटफॉर्मवर लाईव्ह केली जाण्याची शक्यता आहे.
हेही वाचा : सेवानिवृत्त सैनिकाने मुलाचा खून करून घेतला गळफास; कारण आलं समोर
EPFO सदस्यांना त्यांची पीएफ रक्कम थेट डिजिटल वॉलेट किंवा बँक खात्यात मिळू शकणार आहे. यामुळे नोकरदार वर्गाला पीएफ काढण्याची प्रक्रिया जलद आणि सुलभ होणार आहे. सध्या पीएफ काढण्याची प्रक्रिया साधारणतः ७ दिवसांमध्ये पूर्ण होते, मात्र UPI एकत्रीकरणानंतर ही प्रक्रिया काही तासांत किंवा अगदी मिनिटांत पूर्ण होऊ शकते. या सुविधेमुळे दावा नाकारण्याची शक्यता कमी होईल तसेच व्यवहार अधिक पारदर्शक होतील.
याशिवाय, EPFO आपल्या ‘EPFO 3.0’ उपक्रमांतर्गत एटीएमद्वारे पीएफ काढण्याची सुविधा सुरू करण्याचा विचार करत आहे. या अंतर्गत, EPFO सदस्यांना त्यांचे भविष्य निर्वाह निधी थेट एटीएमद्वारे काढण्याची संधी मिळेल. या सुविधेचा मुख्य उद्देश बचतीसाठी सहज प्रवेश मिळवणे, कागदपत्रांची गरज कमी करणे आणि वापरकर्त्यांचा अनुभव अधिक सुलभ करणे हा आहे.
अधिकृत घोषणा आणि अंमलबजावणीची प्रतीक्षा
सद्यस्थितीत EPFO कडून या सुविधांबाबत कोणतीही अधिकृत घोषणा करण्यात आलेली नाही. मात्र, लवकरच याबाबत औपचारिक अधिसूचना जारी केली जाण्याची शक्यता आहे. या सुविधांच्या अंमलबजावणीनंतर, EPFO सदस्यांना त्यांच्या पैशांवर अधिक वेगाने आणि सोप्या पद्धतीने प्रवेश मिळेल.
सर्व EPFO सदस्यांसाठी ही अत्यंत महत्त्वाची आणि आनंदाची बातमी असून, सरकारच्या या निर्णयामुळे लाखो नोकरदारांना मोठा दिलासा मिळणार आहे.
