जळगाव : शहरातील नगर भूमापन अधिकारी कार्यालयात काम करणाऱ्या एका खासगी व्यक्तीस लाच घेताना लाचलुचपत प्रतिबंधक विभागाने (एसीबी) रंगेहात अटक केली. वारस नोंदणी, हक्कसोड प्रक्रिया आणि कर्ज नोंदीसाठी संबंधित अधिकाऱ्याकडून काम करून देण्याच्या मोबदल्यात त्याने लाचेची मागणी केली होती. ही कारवाई मंगळवारी सायंकाळी करण्यात आली.
या प्रकरणात अविनाश सदाशिव सनंसे (वय ४९) असे अटकेतील खासगी व्यक्तीचे नाव आहे. त्याने तक्रारदाराकडे वारस नोंदणी, हक्कसोड प्रक्रिया आणि कर्जाच्या नोंदीसाठी एकूण १५ हजार रुपयांची मागणी केली होती. प्रारंभी प्रत्येक नोंदणीसाठी ५ हजार आणि काम सुरू करण्यासाठी १,५०० रुपये अशी मागणी करण्यात आली होती. मात्र, तडजोडीनंतर ही रक्कम १ हजार रुपये निश्चित झाली.
तक्रारदाराने लाचलुचपत प्रतिबंधक विभागाकडे तक्रार दाखल केली. त्यानंतर विभागाने मंगळवारी दुपारी सापळा रचला. ठरल्याप्रमाणे तक्रारदाराने आरोपीला १ हजार रुपयांची लाच देताच, लाचलुचपत प्रतिबंधक विभागाच्या पथकाने अविनाश सनंसे याला रंगेहात पकडले.
गुन्हा दाखल, पुढील तपास सुरू
या प्रकरणी जळगाव जिल्हा पेठ पोलीस ठाण्यात गुन्हा दाखल करण्यात आला असून पुढील तपास सुरू आहे. नगर भूमापन कार्यालयातील अधिकाऱ्यांच्या संगनमताने खासगी व्यक्तींकडून लाच घेण्याच्या प्रकरणांवर लाचलुचपत विभागाच्या कारवाईने चाप बसणार आहे.
