चेन्नई सुपरकिंग्स संघ आज पंजाब किंग्सचा सामना करणार आहे. प्ले ऑफसाठी रस्सीखेच सुरू असताना चेन्नईचा संघ सहाव्या विजयासाठी, तर पंजाबचा संघ चौथ्या विजयासाठी प्रयत्नांची शिकस्त करताना दिसणार आहे.
पंजाबने ईडन गार्डन स्टेडियममध्ये झालेल्या लढतीत कोलकताविरुद्ध २६२ धावांचा विक्रमी पाठलाग केला. जॉनी बेअरस्टोच्या झंझावाती शतकाच्या जोरावर पंजाबने हा देदीप्यमान विजय मिळवला; पण चेन्नई- पंजाब यांच्यामधील लढत चेन्नईतील चेपॉक स्टेडियमच्या खेळपट्टीवर होणार आहे.
येथे उत्तरार्धातही गोलंदाजांकडून प्रभावी कामगिरी होत आहे. चेन्नईने मागील लढतीत हैदराबादचा डाव १३४ धावांवर संपुष्टात आणत ७८ धावांनी विजय संपादन केला होता. त्यामुळे येथील खेळपट्टीवर दोन्ही संघांतील गोलंदाजांना चमक दाखवण्याची संधी असणार आहे.
