बीड: मस्साजोगचे सरपंच संतोष देशमुख हत्याप्रकरणावरून आमने-सामने आलेले भाजप आमदार सुरेश धस आणि राज्याचे अन्न व नागरी पुरवठा मंत्री धनंजय मुंडे यांची गुप्त भेट झाल्याची माहिती समोर आली आहे.
सूत्रांच्या माहितीनुसार, एका खासगी रुग्णालयात ही भेट झाल्याचे सांगितले जात आहे. विशेष म्हणजे, गेल्या काही महिन्यांपासून धस यांनी मुंडेंवर सातत्याने गंभीर आरोप केले होते. त्यामुळे या अनपेक्षित भेटीमुळे राजकीय वर्तुळात उलटसुलट चर्चांना उधाण आले आहे.
हेही वाचा : मधुचंद्राची रात्र; नववधूनं केलं असं काही की नवऱ्यावर आली रडण्याची वेळ
सूत्रांनी दिलेल्या माहितीनुसार, साधारणतः चार ते पाच दिवसांपूर्वी ही भेट झाली आहे. संतोष देशमुख यांच्या हत्याप्रकरणातील खंडणीच्या गुन्ह्यात मंत्री धनंजय मुंडे यांचे निकटवर्तीय वाल्मिक कराड हे सध्या पोलीस कोठडीत आहेत. हे प्रकरण सुरेश धस यांनी मोठ्या आक्रमकपणे लावून धरले होते आणि मुंडेंवर थेट आरोप केले होते. त्यामुळे अचानक दोघांची गुप्त भेट कशी आणि का झाली, याची चर्चा सुरू झाली आहे.
सामाजिक कार्यकर्त्या अंजली दमानिया यांनी या भेटीवर प्रतिक्रिया देताना ती अतिशय धक्कादायक असल्याचे म्हटले आहे. “माझ्या माहितीनुसार भाजपचे नेते आणि महसूलमंत्री चंद्रशेखर बावनकुळे यांनी दोघांमध्ये समेट घडवून आणला आहे. पण ही बाब गंभीर आहे. कारण यापूर्वी सुरेश धस हे धनंजय मुंडेंवर आक्रमक होते. आता ते मागे हटतील का? हे पाहणे महत्त्वाचे ठरेल,” असे त्यांनी स्पष्ट केले.
हेही वाचा : ‘आरबीआय’ने घातली ‘या’ बँकेवर बंदी, आता कोणताही ग्राहक काढू शकणार नाहीत ‘पैसे’
दरम्यान, मंत्री धनंजय मुंडे यांच्या कार्यालयाने मात्र भेटीच्या वृत्ताचे खंडन केले आहे. “अशी कोणतीही भेट झालेली नाही,” असे स्पष्टीकरण कार्यालयाकडून देण्यात आले आहे. मात्र, या दाव्यावर विश्वास ठेवायचा की नाही, हा प्रश्न उपस्थित होत आहे.
भाजप प्रदेशाध्यक्ष चंद्रशेखर बावनकुळे यांनी प्रतिक्रिया देताना सांगितले, “मी पक्षाचा अध्यक्ष आहे, माझ्याकडे दोघेही भेटले होते. त्यांच्या काही मतभेद आहेत, मात्र मनभेद नाहीत. दोघेही इमोशनल आहेत. राजकारणात असे प्रसंग येतात, पण काळ हे मतभेद दूर करतो. त्यामुळे धनंजय मुंडे आणि सुरेश धस यांच्यातील भेट ही कौटुंबिक भेट होती.”
शिवसेनेच्या नेत्या सुषमा अंधारे यांनी या भेटीवर जोरदार टीका केली आहे. “सुरेश धस आणि धनंजय मुंडे यांची भेट झाली की नाही, याबद्दल स्पष्टता नाही. मात्र, जर ही भेट झाली असेल तर सुरेश धस यांची विश्वासार्हता संपलेली आहे. याचबरोबर, देवेंद्र फडणवीस यांचीही विश्वासार्हता धोक्यात आली आहे,” असे त्या म्हणाल्या.
राजकीय पडसाद
धनंजय मुंडे आणि सुरेश धस यांच्या या गुप्त भेटीमुळे आगामी राजकीय समीकरणे कशी बदलतात, हे पाहणे महत्त्वाचे ठरणार आहे.
