Dhule News : बँकेच्या पिंग्मी एजंटला रस्त्यात गाठून दरोडा घालत त्याच्याकडील रोकड हिसकावल्याची घटना घडली. अखेर पोलिसांनी १५ तासांत संशयितांच्या मुसक्या आवडल्या असून, ८ लाखांच्या मुद्देमाल जप्त केला आहे. योगेश विजय पवार, गौरव विजय पवार दोघे रा. लोकमान्य नगर, साक्री, गणेश राजेंद्र देसले रा. गणेशनगर, साक्री, दीपक उर्मल पवार, दावल अरुण भवरे आणि संपत उर्फ संप्या अशोक मालचे रा. गढी भिलाटी साक्री या संशयीतांना ताब्यात घेतले आहे.
साक्री शहरातील लक्ष्मी रोड भागात राहणारे प्रमोद पारखचंद टाटीया हे गेल्या २५ वर्षांपासून हस्ती बँकेच्या साक्री शाखेत पिग्मी एजंट म्हणून काम करीत आहेत. २४ ऑगस्ट रोजी रात्री ९.१५ वाजेच्या सुमारास टाटीया हे बँकेचे संपूर्ण दिवसाचे १ लाख १० हजार रुपयांचे कलेक्शन, बालाजी कंपनीचे कलेक्शन मशीन, पांढऱ्या रंगाच्या जाड कापडी पिशवीत ठेवून एम. एच. १८ ए. बी. ७८५९ क्रमांकाच्या मोटरसायकलने घराकडे जात असताना पांढऱ्या रंगाच्या कारने मागून टाटीया यांच्या दुचाकीला धडक दिली. धडकेनंतर कार पेरेजपुर रोडकेडे निघून गेली. कारने धडक दिल्याने प्रमोद टाटीया हे खाली पडले.
जवळच बाकावर बसलेल्या २१ ते २२ वयोगटातील मुलांनी मदत करण्याच्या बहाण्याने टाटीया यांच्या हातातील पिशवी घेऊन ज्या दिशेने कार गेली. त्या दिशेने पलायन केले. या घटनेनंतर प्रमोद टाटीया यांनी साक्री पोलिसात फिर्याद दिली. भादंवि ३९२ प्रमाणे संशयितांविरुध्द गुन्हा दाखल करण्यात आला होता. पीआय निकम यांनी आरोपींच्या शोधासाठी पथके तयार केली. अवघ्या १५ तासात पीआय निकम यांच्या पथकाला यश आले. योगेश विजय पवार, गौरव विजय पवार दोघे रा. लोकमान्य नगर, साक्री, गणेश राजेंद्र देसले रा. गणेशनगर, साक्री, दीपक उर्मल पवार, दावल अरुण भवरे आणि संपत उर्फ संप्या अशोक मालचे रा. गढी भिलाटी साक्री या संशयीतांना ताब्यात घेतले. आरोपींनी गुन्ह्याची कबुली दिली असून त्यांच्याकडून ८ लाख १२ हजार ४०० रुपयांचा मुद्देमाल जप्त करण्यात आला आहे.
