बाराबंकी, उत्तर प्रदेश : वीज बिल कमी करण्याच्या बदल्यात पत्नीला आपल्याकडे घेऊन येण्याची ऑफर दिल्याचा गंभीर आरोप एका शेतकऱ्याने वीज विभागातील कनिष्ठ अभियंता (JE) वर केला आहे. या प्रकरणामुळे संपूर्ण परिसरात खळबळ उडाली असून, शेतकऱ्याने वीज विभागाच्या वरिष्ठ अधिकाऱ्यांकडे तक्रार दाखल केली आहे. मात्र, अभियंत्याने या आरोपांना साफ नकार दिला आहे.
बाराबंकी जिल्ह्यातील हैदरगढ तहसील परिसरातील शाहपूर शिदवी गावातील हा प्रकार असून, पीडित शेतकऱ्याने मुख्यमंत्री पोर्टलद्वारे मध्यांचल विद्युत विभागाच्या एमडीकडे तक्रार नोंदवली आहे. १३ मार्च २०२४ रोजी, वीज विभागाचे कनिष्ठ अभियंता प्रदीप कुमार यांनी शेतकऱ्याच्या घराची तपासणी केली होती. तपासणी दरम्यान, अभियंत्याने शेतकऱ्याच्या पत्नीला पाहून तिच्यावर टिप्पणी करत, “तुझी पत्नी खूप सुंदर आहे, जर तुला वीज बिल कमी करून घ्यायचे असेल, तर तुझ्या पत्नीला माझ्याकडे घेऊन ये,” असे वादग्रस्त वक्तव्य केल्याचा आरोप आहे.
हेही वाचा : Android आणि iPhone वापरकर्त्यांसाठी महत्वाची बातमी, जाणून घ्या काय आहे?
शेतकऱ्याने सांगितले की, त्यानंतर काही दिवसांत त्याच्या घराचे वीज बिल अचानक वाढवण्यात आले आणि त्याला तब्बल ₹९४,८६४ रुपयांचे बिल पाठवण्यात आले. अभियंत्याने जाणीवपूर्वक चुकीचे रीडिंग नोंदवून बिल वाढवल्याचा आरोप शेतकऱ्याने केला आहे. इतकेच नाही, तर त्यानंतर वीज जोडणीही तोडण्यात आली.
शेतकऱ्याने वीज विभागाकडे वारंवार धाव घेतली, मात्र समाधानकारक उत्तर न मिळाल्याने तो ३१ जानेवारी २०२५ रोजी पुन्हा कनिष्ठ अभियंत्याच्या कार्यालयात गेला. तेव्हा अभियंता प्रदीप कुमार यांनी पुन्हा एकदा त्याच वादग्रस्त मागणीचा पुनरुच्चार केला. अभियंता म्हणाले, “वीज बिल कमी करायचं असेल, तर ४०,००० रुपये आणि तुमच्या पत्नीला सोबत आणा, मगच तुमचं काम होईल.”
या प्रकरणावर अभियंता प्रदीप कुमार यांनी प्रतिक्रिया देताना, हे सर्व आरोप निराधार आणि खोटे असल्याचा दावा केला आहे. त्यांनी सांगितले की, “जर आरोप खरे असतील, तर संबंधित व्यक्तीकडे पुरावे असावेत. माझ्यावर खोटा आरोप केला जात आहे.” अभियंत्यानेही वरिष्ठ अधिकाऱ्यांकडे तक्रार दाखल केली असून, सत्य बाहेर यावे म्हणून तपास होण्याची मागणी केली आहे.
या प्रकरणाची माहिती मिळताच वीज विभागाने चौकशी सुरू केली आहे. प्रशासनाकडून तक्रारीची सत्यता पडताळून पाहिली जात असून, दोन्ही बाजूंनी पुरावे गोळा करण्याचे काम सुरू आहे. जर शेतकऱ्याचे आरोप सिद्ध झाले, तर संबंधित अभियंत्यावर कठोर कारवाई होण्याची शक्यता आहे.
ही घटना समोर आल्यानंतर सोशल मीडियावर मोठ्या प्रमाणात संताप व्यक्त केला जात आहे. शेतकऱ्याने वीज बिल कमी करण्यासाठी दिलेला अर्ज आणि या संपूर्ण प्रकरणाचा उल्लेख असलेले व्हिडीओ व फोटो सध्या सोशल मीडियावर व्हायरल होत आहेत.
जनतेत संताप, कठोर कारवाईची मागणी
स्थानिक नागरिक आणि सामाजिक संघटनांनी या प्रकरणाची सखोल चौकशी करून दोषींवर कठोर कारवाई करण्याची मागणी केली आहे. “शासकीय अधिकाऱ्यांकडून असा प्रकार घडणे म्हणजे जनतेच्या विश्वासाला तडा जाणे आहे. प्रशासनाने याला गांभीर्याने घेतले पाहिजे,” अशी प्रतिक्रिया एका स्थानिक रहिवाशाने दिली. आता वीज विभाग आणि प्रशासन या प्रकरणावर काय भूमिका घेते आणि सत्य काय आहे, हे तपासाअंतीच स्पष्ट होईल.
