तरुण भारत लाईव्ह ।९ मार्च २०२३। समृद्धी महामार्गाने जाणाऱ्या भाविकांची स्विफ्ट कार आणि ट्रकच्या धडकेत तीन प्रवाशांचा जागीच मृत्यू झाल्याची घटना घडली आहे. अपघाताची माहिती मिळताच संबधित यंत्रणांनी घटनास्थळी धाव घेत मदतकार्य सुरु केले.
सूत्राने दिलेल्या माहितीनुसार, शिर्डीला साईबाबांचे दर्शन करून शिर्डीहून छत्रपती संभाजीनगरकडे समृद्धी महामार्गाने जाणाऱ्या भाविकांची स्विफ्ट कार आणि ट्रकच्या धडकेत तीन प्रवाशांचा जागीच मृत्यू झाला आहे. हा भीषण अपघात 8 मार्च रोजी रात्री साडेनऊच्या सुमारास वैजापूर तालुक्यातील हडस पिंपळगावजवळील पथकर नाक्याजवळ झाला. अनिल किसन राठोड, भाग्यश्री अनिल राठोड, रोहन सुनील राठोड अशी मृतांची नावे आहेत.
शिर्डीहून छत्रपती संभाजीनगरच्या दिशेने जात असलेली स्विफ्ट कार (एमएच 14 एफसी 5387) ही मालवाहू ट्रक (एमएच 18 बीजी 7702) ला पाठीमागून जोरात धडकली. या भीषण अपघातात चालक अनिल राठोड, त्यांची पत्नी भाग्यश्री राठोड आणि रोहित राठोड या तिघांचा जागीच मृत्यू झाला आहे. तर आदित्य अनिल राठोड (वय वय 12 वर्षे), लावण्या अनिल राठोड (वय 10 वर्षे) हे जखमी झाले आहे. हा अपघात एवढा भीषण होता की, गाडीचा चुराडा झाला आहे.
घटनास्थळी सर्वत्र रक्ताचा सडा पाहायला मिळत होता. तर जखमी झालेल्या मुलांसमोर आपल्या आई वडिलांचा मृतदेह पडलेला असल्याने त्यांना रडू कोसळले. तर दोन्ही मुलं प्रचंड घाबरून गेले होते. यावेळी पोलिसांनी त्यांना धीर देत नातेवाईकांना याबाबत माहिती दिली. घटना घडताच ट्रकचालक पसार झाला. या प्रकरणी वैजापूर ठाण्यात गुन्हा दाखल झाला.
