पुणे : नववर्षाच्या सुरुवातीलाच पुण्यात भाजपने शिवसेना (ठाकरे गट) ला मोठा धक्का दिला आहे. ठाकरे गटातील पाच माजी नगरसेवकांनी शिवबंधन सोडून भाजपचा कमळ हाती घेतलं आहे. या प्रवेशामुळे आधीच कमी ताकदीच्या ठाकरे गटाची पुणे शहरातील स्थिती आणखी कमजोर झाली आहे.
भाजपात प्रवेश करणारे माजी नगरसेवक
विशाल धनवडे, बाळा ओसवाल, प्राची आल्हाट, संगीता ठोसर आणि पल्लवी जावळे या पाच माजी नगरसेवकांनी आज चंद्रशेखर बावनकुळे, मुरलीधर मोहोळ आणि चंद्रकांत पाटील यांच्या उपस्थितीत भाजपात प्रवेश केला. यावेळी विशाल धनवडे यांनी ठाकरे गटाच्या नेतृत्वावर जोरदार टीका केली.
पुण्यात भाजपची वाढती ताकद
या प्रवेशामुळे भाजपची पुणे महापालिकेवरील पकड आणखी मजबूत झाली आहे. महापालिकेत सत्तेवर एकहाती वर्चस्व मिळवण्यासाठी भाजप प्रयत्नशील आहे, आणि हा पक्षप्रवेश त्याचाच भाग मानला जात आहे. मात्र, भाजपात या माजी नगरसेवकांच्या प्रवेशामुळे अंतर्गत नाराजी वाढल्याच्या चर्चा देखील सुरू आहेत.
ठाकरे गटाची स्थिती खालावली
पुण्यात ठाकरे गटाचे सुरुवातीला 10 नगरसेवक होते. शिंदे गटात नाना भानगिरे गेल्यानंतर आता पाच नगरसेवक भाजपात दाखल झाले आहेत. त्यामुळे फक्त चार नगरसेवक ठाकरे गटासोबत राहिले आहेत. आगामी महापालिका निवडणुकीच्या पार्श्वभूमीवर ही परिस्थिती ठाकरे गटासाठी गंभीर मानली जात आहे.
महापालिका निवडणुकीतील प्रभाव
महापालिका निवडणुकीपूर्वी आलेल्या या धक्क्यामुळे ठाकरे गटासमोर मोठं आव्हान उभं राहिलं आहे. दुसरीकडे, भाजपला या पक्षप्रवेशाचा फायदा होईल का अंतर्गत नाराजीमुळे फटका बसेल, हे आगामी निवडणुकीत स्पष्ट होईल.
पक्षनेतृत्वापुढील आव्हान
पक्षनेतृत्वाला आता नव्या राजकीय समीकरणांचा विचार करून रणनीती आखावी लागणार आहे. यामुळे आगामी निवडणुकीत पुण्यात शिवसेना (ठाकरे गट) किती प्रभावी ठरते, हे पाहणे महत्त्वाचे ठरेल.
