---Advertisement---
पाचोरा : आगामी गणेशोत्सव,ईद,दुर्गात्सव या सणांच्या पार्श्वभूमीवर शांतता समितीच्या बैठकीचे आयोजन करण्यात आले होते. ही बैठक आमदार किशोर पाटील यांच्या प्रमुख उपस्थितीत व्यापारी भवन येथे पार पडली. गणेश मंडळांनी कमी उंचीच्या गणेश मूर्तीची स्थापना करावी असे आवाहन आमदार किशोर पाटील यांनी केले.
बैठकीत आमदार किशोर पाटील म्हणाले की, पाचोऱ्याप्रमाणेच भडगावमध्येही मोठ्या उंचीच्या मूर्तींची स्थापना केली जाते. भडगाव शहरातील आझाद मित्र मंडळाच्या गणेशमूर्तीमुळे नगरदेवळा कमान मला तोडावी लागली आणि नवीन कमान बांधावी लागली, असा किस्साही आमदार किशोर पाटील यांनी सांगितला.
ते पुढे म्हणाले की, आपल्या भावना महत्त्वाच्या असून त्या भावना जर शुद्ध असतील तर आपल्या देव्हाऱ्यातील गणपतीही दोन इंचाचा असतो. त्यासाठी 25 फुटाचाच गणपती हवा, तेव्हाच तो पावतो, असं नाही. मूर्ती आणताना मूर्तीचा हात, पाय तुटतो. कधी सोंड तुटते. त्यामुळे आपणच आपल्या दैवताची विटंबना करतो, असं म्हटलं तर वावगं ठरणार नाही. जर धरणाला पाणी नसेल तर त्या मुर्तीचे विसर्जन तुम्ही कुठे करणार, असा सवालही त्यांनी गणेशमंडळांना करत आगामी काळात कमी उंचीची गणपतीची मूर्तीची स्थापना करावी आणि आपल्या विचारांची उंची वाढवावी, असे आवाहन आमदार किशोर पाटील यांनी गणेशमंडळांना केले.
दरम्यान, भडगाव रोडवरील व्यापारी भवनात शनिवारी झालेल्या या बैठकीला चाळीसगाव अप्पर पोलीस अधीक्षक कविता नेरकर, पाचोरा नगरपालिकेचे मुख्याधिकारी मंगेश देवरे, तहसिलदार विजय बनसोडे, पोलीस निरीक्षक राहुलकुमार पवार तसेच पोलीस पाटील, पोलीस कर्मचारी, होमगार्ड, गणेश मंडळांचे पदाधिकारी, सदस्य मोठ्या संख्येने उपस्थित होते.
