मुंबई : शिक्षकाने शाळेतील चार मुलींवर लैंगिक अत्याचार केल्याची घटना उघड झाली आहे. शिक्षा देण्याच्या नावाखाली हा शिक्षक मुलींचा लैंगिक छळ करीत असल्याची माहिती काही विद्यार्थिनींनी त्यांच्या पालकांना दिली होती. त्यांनतर पालकांनी शिक्षकाला चोप देत पोलिसांच्या हवाली केले आहे. विक्रोळी पोलीस ठाण्यात शिक्षकावर गुन्हा दाखल करून त्याला आता अटक केली आहे.
मुंबईतील विक्रोळी परिसरात ही घटना घडली आहे. विक्रोळी पूर्वेतील एका मनपा शाळेतील 4 विद्यार्थिनींवर पीटी शिक्षकाने लैंगिक अत्याचार केला. याप्रकरणी पोलिसांनी पीटी शिक्षकाला अटक केली असून, या घटनेमुळे विक्रोळी पोलीस स्टेशनसमोर सर्वच राजकीय पक्षांनी धाव घेतली. या घटनेचा जाहीर निषेध करत शिक्षकावर कडक कारवाईची मागणी देखील करण्यात आली.
शिंदे गटाचे पदाधिकारी हे या घटने संदर्भात विक्रोळी पोलीस स्टेशनमध्ये आले होते. याच दरम्यान वंचित बहुजन आघाडीचे उपाध्यक्ष चेतन अहिरे यांच्या उपस्थितीत वंचित बहुजन आघाडीच्या पदाधिकारी आणि कार्यकर्त्यांनी शिंदे सरकारचा जाहीर निषेध करण्यास सुरुवात केली. यामुळे विक्रोळी पोलिस स्टेशनसमोर तणावाचे वातावरण निर्माण झाले होते.
