जळगावच्या सुवर्णपेठेत सोन्याच्या दरात अचानक तेजी आलीय. यामुळे लग्नसराईसाठी सोन्याचे दागिने बनविणाऱ्या ग्राहकांना मोठी झळ बसत आहे. अमेरिकेत डोनाल्ड ट्रम्प सरकार पुन्हा सत्तेत येण्याच्या अटकळींमुळे आंतरराष्ट्रीय बाजारात सोने-चांदीच्या दरात वाढ झाली आहे, यामुळे जळगावच्या सोने बाजारात सोन्याचा तोळा पुन्हा ८० हजार रुपयांच्या पार झाला आहे.
गेल्या पंधरवड्यात सोन्याच्या दरात प्रति तोळ्यामागे २ हजार रुपयांची वाढ झाली आहे. शुक्रवारी सोने महाग होऊन प्रतितोळा ८०४०० रुपये (जीएसटीसह ८२८१२ रुपये) झाले आहे. दुसरीकडे चांदीचा दर विना जीएसटी ९२००० रुपये प्रति किलो इतका आहे.
सोन्याचे प्रतितोळ्याचे दर ११ नोव्हेंबर रोजी विना जीएसटी ७७,७०० तर जीएसटीसह ८०,०३१ रुपयांवर गेले होते. त्या अगोदर ३१ ऑक्टोबर रोजी विना जीएसटी ८० हजारांवर तर जीएसटीसह ८२४०० वर गेले होते. शुक्रवारी सोने विना जीएसटी ८०४०० व जीएसटीसह ८२८१२ वर पोहचले आहे.
सध्या सोन्याच्या दरात तेजीची स्थिती असली तरी, येणाऱ्या आठवड्यात सोने दरात फारशी वाढ होणे अपेक्षित नाही. जाणकारांनी सोने दरात पाचशे ते हजार रुपये चढउतार होण्याची शक्यता वर्तविली आहे.
