मुंबई | 12वीच्या पहिल्याच इंग्रजीच्या पेपरात चुकीच्या प्रश्नाचे गुण विद्यार्थ्यांना देण्यात येणार असल्याचा निर्णय घेण्यात आला आहे. मात्र हे गुण कुणाला मिळणार? हा प्रश्न अनुत्तरित होता. यावर आता मंडळाकडून स्पष्टीकरण देण्यात आले आहे. मंडळाने या प्रश्नाचे सरसकट गुण विद्यार्थ्याना द्यावेत अशी मागणी पालक, शिक्षकांमधून होत होती. या पार्श्वभूमीवर संयुक्त सभा घेऊन त्याच्या अहवालानुसार निर्णय घेतला जाईल असे मंडळाने सोष्ट केले होते. त्यामुळे अहवालानंतर आता मंडळाकडून गुण देण्याचा निर्णय घेण्यात आला आहे.
12वीच्या इंग्रजी विषयाकरिता ८० गुणांची कृतिपत्रिका असते. त्यात प्रश्न क्रमांक ३ मध्ये १४ गुणांसाठी कवितेवर आधारित प्रश्न विचारले जातात. सोमवारच्या प्रश्नपत्रिकेत a-३,a-४, a-५ या तीन कृतींमध्ये दोन प्रश्न छापण्यात आलेले नाहीत, तर एका प्रश्नांऐवजी उत्तरच छापण्यात आले आहे. त्यामुळे विद्यार्थी संभ्रमावस्थेत सापडले तर काही विद्यार्थ्यांनी तर गोंधळून प्रश्नांची उत्तरे लिहिलीच नाहीत. मंडळाने तयार केलेल्या ‘नमुना उत्तरपत्रिका म्हणजेच मॉडेल आन्सर’ मधील a-३, a-४, a-५ ही उत्तरे सूचानासह जशीच्या तशीच कृतिपत्रिकेत छापून आली होती. विद्यार्थ्यांनी या संभ्रमात प्रश्नच न समजल्याने उत्तरे टाळली होती.
गुण कोणाला मिळणार?
खालील तीन पैकी कोणत्याही एका प्रकारचे लेखन उत्तरपत्रिकेत विद्यार्थ्यांनि केले असल्यास, विद्यार्थ्यास प्रत्येक प्रश्नाचे प्रत्येकी २ याप्रमाणे एकूण ०६ गुण देण्याचा निर्णय घेण्यात आलेला आहे.
१. कविता विभाग/ कविता प्रश्न क्रमांक असा केवळ उत्तरपत्रिकेमध्ये उल्लेख केला असल्यास
२. Poetry Section-2 मधील अन्य कोणतेही प्रश्न विद्यार्थ्यांनी सोडविण्याचा प्रयत्न केला असल्यास
३.असा प्रश्नाचे क्रमांक (A-3, A-4, A-5) असे केवळ उत्तरपत्रिकेत नमुद केले असल्यास.
