नवी दिल्ली : केंद्र सरकारच्या इलेक्ट्रॉनिक्स आणि माहिती तंत्रज्ञान मंत्रालयाच्या ‘इंडियन कम्प्युटर इमरजन्सी रिस्पॉन्स टीम’ (CERT-In) ने Android आणि iPhone वापरकर्त्यांसाठी गंभीर सुरक्षेचा इशारा जारी केला आहे. हा इशारा विशेषतः Android 12 आणि त्यानंतरच्या व्हर्जनसह iPhone 8 आणि त्यानंतरच्या एडिशनसाठी आहे.
CERT-In च्या अहवालानुसार, Android च्या फ्रेमवर्कमध्ये तसेच काही चिपसेटच्या घटकांमध्ये मोठे सुरक्षा दोष आढळले आहेत. या दोषांमुळे हॅकर्सना डिव्हाइसेसवर अनधिकृत प्रवेश मिळवता येतो, संवेदनशील माहिती चोरीला जाऊ शकते, तसेच “डिनायल ऑफ सर्व्हिस” (DoS) हल्ले होऊ शकतात. यामुळे स्मार्टफोन्सच्या कार्यक्षमतेवर परिणाम होऊ शकतो आणि वापरकर्त्यांचा डेटा धोक्यात येऊ शकतो.
हेही वाचा : वीज बिल कमी करण्याच्या बदल्यात पत्नीची मागणी? शेतकऱ्याचा जेईवर गंभीर आरोप!
Android आणि iPhone वापरकर्त्यांसाठी महत्त्वाचे सुरक्षा उपाय
सतत सॉफ्टवेअर अपडेट करा : Android 12, 13, 14, आणि 15 वापरणाऱ्या सर्व वापरकर्त्यांनी तातडीने आपल्या डिव्हाइससाठी नवीनतम सुरक्षा अपडेट्स इंस्टॉल करावेत. iPhone 8 ते iPhone 11 वापरणाऱ्यांनी देखील iOS अपडेट करावा. ऑटोमॅटिक अपडेट्स सुरू ठेवा.
संदिग्ध लिंक्स आणि अज्ञात अॅप्सपासून सावधगिरी बाळगा: अनोळखी किंवा संशयास्पद लिंक्सवर क्लिक करू नका आणि अधिकृत अॅप स्टोअर्समधूनच अॅप्स डाउनलोड करा.
अॅप परमिशन्स तपासा: कोणत्याही अॅपला गरजेपेक्षा जास्त परमिशन्स देऊ नका. अॅप सेटिंग्जमध्ये जाऊन अनुमती नियंत्रण तपासा.
सुरक्षित लॉगिन आणि 2FA वापरा : बँकिंग आणि सोशल मीडिया खात्यांसाठी टू-फॅक्टर ऑथेंटिकेशन (2FA) सक्षम करा आणि मजबूत पासवर्ड वापरा.
फिशिंग हल्ल्यांपासून बचाव : अनपेक्षित ईमेल्स किंवा मेसेजमधून तुमची वैयक्तिक माहिती विचारली जात असेल, तर ती त्वरित सत्यापित करा.
सुरक्षितता राखा, सायबर हल्ल्यांपासून मिळवा संरक्षण
सायबर सुरक्षेच्या वाढत्या धोक्यांच्या पार्श्वभूमीवर सरकारकडून हा इशारा देण्यात आला आहे. योग्य खबरदारी घेतल्यास, हॅकर्सच्या हल्ल्यांपासून बचाव करता येईल आणि तुमच्या वैयक्तिक माहितीचे संरक्षण शक्य होईल. Android आणि iPhone वापरकर्त्यांनी तातडीने सुरक्षितता उपाय अवलंबावेत.
