पुणे : पिंपरी-चिंचवड आणि जिल्ह्यात गुलेन बॅरी सिंड्रोम (GBS) या गंभीर आजाराने रुग्णसंख्या 73 पर्यंत पोहोचली आहे. गेल्या दोन दिवसांत या रुग्णसंख्येत झपाट्याने वाढ होत असल्याने पुणेकरांनी मोफत उपचारांची मागणी केली होती. या मागणीला प्रतिसाद देत उपमुख्यमंत्री आणि जिल्ह्याचे पालकमंत्री अजित पवार यांनी मोठी घोषणा केली आहे.
प्रजासत्ताक दिनाच्या निमित्ताने आयोजित कार्यक्रमात अजित पवार यांनी ध्वजारोहण केले. यावेळी माध्यमांशी बोलताना त्यांनी GBS च्या वाढत्या रुग्णसंख्येबाबत चिंता व्यक्त केली. त्यांनी सांगितले की, नागरिकांनी घाबरू नये, योग्य काळजी घ्यावी, आणि शासकीय सुविधांचा लाभ घ्यावा. महापालिका आयुक्तांना या संदर्भात तातडीच्या सूचना दिल्या असून, पुण्यातील कमला नेहरू रुग्णालयात या आजारावर मोफत उपचार केले जाणार असल्याचे त्यांनी स्पष्ट केले.
पुण्यातील एका रुग्णाचा शनिवारी (25 जानेवारी) सोलापूर येथे उपचारादरम्यान मृत्यू झाल्याची माहिती समोर आली आहे. त्याला जुलाबाचा त्रास सुरू झाल्यानंतर GBS चे निदान झाले होते. या पार्श्वभूमीवर, नागरिकांनी खालील सावधगिरीचे उपाय पाळण्याचे आवाहन करण्यात आले आहे.
- पाणी उकळून व गाळून प्यावे.
- उघड्यावर विकले जाणारे किंवा शिळे अन्न खाणे टाळावे.
- हातापायांमध्ये अशक्तपणा जाणवल्यास त्वरित डॉक्टरांचा सल्ला घ्यावा.
- नजीकच्या शासकीय रुग्णालयात जाण्यासाठी विलंब करू नये.
कॅम्पिलोबॅक्टरमुळे GBS कसा होतो?
GBS हा एक दुर्मीळ आजार असून, प्रतिकारशक्तीच्या विकृतीमुळे तो होतो. दूषित पाणी किंवा अन्नामुळे कॅम्पिलोबॅक्टर जेजुनी नावाच्या जिवाणूचा संसर्ग होतो, ज्यामुळे अतिसार आणि ओटीपोटात वेदना होतात. या संसर्गानंतर 1 ते 3 आठवड्यांच्या कालावधीत प्रतिकारशक्ती मज्जातंतूंवर हल्ला करते, ज्यामुळे GBS चे निदान होते. डेंग्यू, चिकनगुनिया, किंवा इतर बॅक्टेरियांच्या संक्रमणामुळेही अशाच प्रकारे GBS होऊ शकतो.
कॅम्पिलोबॅक्टर संसर्गाची लक्षणे
- अतिसार
- पोटदुखी
- ताप
- मळमळ किंवा उलट्या
सर्वसामान्यांसाठी प्रशासनाचे आवाहन
शहरात या आजाराची वाढ चिंताजनक असली, तरी नागरिकांनी घाबरून जाण्याचे कारण नाही. राज्य सरकार, महापालिका, आणि आरोग्य खाते या आजाराच्या प्रतिबंधासाठी कार्यरत आहेत. कमला नेहरू रुग्णालयातील मोफत उपचार सुविधा आर्थिकदृष्ट्या नागरिकांना दिलासा देईल, असा विश्वास अजित पवार यांनी व्यक्त केला आहे.
नागरिकांनी सतर्क राहण्याचे आवाहन
आजाराची लक्षणे दिसल्यास किंवा संसर्गाचा संशय असल्यास त्वरित वैद्यकीय मदत घ्यावी. प्रशासनाच्या मार्गदर्शक सूचना पाळून पुणेकरांनी या आजाराला सामोरे जाण्याची तयारी ठेवावी.
