IND vs PAK T20 World Cup: आयसीसी एकदिवसीय विश्वचषक स्पर्धेच्या अंतिम फेरीत अपयशी ठरलेल्या भारतासमोर आता नवी संधी आहे. आयसीसी टी-२० विश्वचषक स्पर्धा जिंकून आयसीसी जेतेपदांचा दुष्काळ संपवण्याची संधी भारतीय संघाकडे आहे. गेल्या ११ वर्षांत भारताला आयसीसीची एकही स्पर्धा जिंकता आलेली नाही. २०१३ मध्ये महेंद्रसिंह धोनीच्या नेतृत्त्वाखाली भारतीय संघानं चॅम्पियन्स ट्रॉफी जिंकली होती. तेव्हापासून आयसीसी आयोजित स्पर्धांमध्ये भारतीय संघाचे हात रिकामेच राहिले आहेत.
यंदाची टी-२० विश्वचषक स्पर्धा IND vs PAK T20 World Cup जूनमध्ये होईल. त्याच्या वेळापत्रकाची घोषणा लवकरच केली जाईल. पण सुत्रांच्या हवाल्यानं भारतीय संघाचं वेळापत्रक समोर आलं आहे. त्यानुसार भारतीय संघाचा पहिला सामना ५ जूनला आयर्लडविरुद्ध होईल. तर दुसरा सामना पाकिस्तानविरुद्ध ९ जूनला खेळवला जाईल. तिसरा सामना १२ जूनला अमेरिकेविरुद्ध होईल. तिन्ही सामने न्यूयॉर्कमध्ये होतील. टी-२० विश्वचषक स्पर्धेचं यजमानपद वेस्ट इंडिज आणि अमेरिकेकडे आहे. शेवटच्या क्षणी विश्वचषक स्पर्धेच्या वेळापत्रकात बदल होऊ शकतात.
भारतीय संघाचं वेळापत्रक
५ जून आयर्लंडविरुद्ध, न्यूयॉर्क
९ जून पाकिस्तानविरुद्ध, न्यूयॉर्क
१२ जून अमेरिकेविरुद्ध, न्यूयॉर्क
१५ जून कॅनाडाविरुद्ध, फ्लोरिडा
२० जून सी-१ (न्यूझीलंड) बार्बाडोस
२२ जून श्रीलंकेविरुद्ध, अँटिंग्वा
२४ जून ऑस्ट्रेलियाविरुद्ध, सेंट ल्युसिया
२६ जून उपांत्य फेरीचा पहिला सामना, गयाना
२८ जून उपांत्य फेरीचा दुसरा सामना, त्रिनिदाद
२९ जून अंतिम फेरी
असं असेल टी-२० विश्वचषक स्पर्धेचं स्वरुप
आगामी टी-२० विश्वचषक स्पर्धा ४ जून ते ३० जून या कालावधीत खेळवण्यात येईल. वेस्ट इंडिज आणि अमेरिका स्पर्धेचे आयोजक आहेत. २० संघांचा समावेश असलेली स्पर्धा नॉकआऊटसह एकूण तीन स्टेजमध्ये खेळवण्यात येईल. २० संघांची विभागणी ४ गटांमध्ये करण्यात येईल. प्रत्येक गटात ५ संघ असतील. प्रत्येक गटातील टॉपचे २ संघ पुढच्या फेरीत म्हणजेच सुपर ८ मध्ये प्रवेश करतील. या ८ संघांची विभागणी २ गटांमध्ये होईल. त्या गटांमध्ये प्रत्येकी ४ संघ असतील. दोन्ही गटांतील टॉपचे २ संघ उपांत्य फेरीत जातील. उपांत्य फेरी जिंकणारे संघ अंतिम फेरी गाठतील.
या १२ संघांना स्पर्धेत थेट प्रवेश
वेस्ट इंडिज
अमेरिका
ऑस्ट्रेलिया
इंग्लंड
भारत
नेदरलँड्स
न्यूझीलँड
पाकिस्तान
दक्षिण आफ्रिका
श्रीलंका
अफगाणिस्तान
बांग्लादेश
हे ८ संघ ठरले पात्र
आयर्लंड
स्कॉटलँड
पापुआ न्यू गिनी
कॅनडा
नेपाळ
ओमाण
नामिबिया
युगांडा
